IAF Plane Crash Assam: आसाममधील जोरहाट येथील रोरियाह एअर फोर्स स्टेशनवर भारतीय हवाई दलाच्या एका विमानाला भीषण अपघात झाला आहे. हवाई दलाचे ‘AN-32’ हे मालवाहू (वाहतूक) विमान एअरबेसवर लँडिंग करण्याचा प्रयत्न करत असताना अचानक कोसळले. अहवालानुसार, विमानाचे हे लँडिंग अत्यंत कठोर (Rough Landing) झाल्यामुळे हा अपघात घडला आणि विमानाने पेट घेतला. या दुर्दैवी घटनेत भारतीय हवाई दलाच्या 5 जवानांचा मृत्यू झाला असून संपूर्ण देशावर शोककळा पसरली आहे. अपघाताची माहिती मिळताच लष्कराच्या वरिष्ठ अधिकाऱ्यांनी घटनास्थळी धाव घेतली असून तातडीने बचावकार्य सुरू करण्यात आले.
सह-वैमानिक बचावला; 5 शूर जवानांची नावे जाहीर
या भीषण दुर्घटनेतून विमानाचे सह-वैमानिक सुदैवाने बचावले असून, त्यांच्यावर सध्या रुग्णालयात वैद्यकीय उपचार सुरू आहेत. मात्र, देशाची सेवा करताना हवाई दलाच्या 5 जवानांना आपले प्राण गमवावे लागले आहेत. वीरमरण आलेल्या जवानांमध्ये स्क्वाड्रन लीडर प्रशांत सिंग, फ्लाइट लेफ्टनंट शुभम कुमार, सार्जंट जितेंद्र शर्मा, अग्निवीरवायू खेमाराम कुमावत आणि अग्निवीरवायू दानिश आलम यांचा समावेश आहे. विमानाला लागलेली आग विझवण्यात आली असून घटनास्थळावरून विमानाचे अवशेष गोळा करण्याचे काम सुरू आहे.
हवाई दलाकडून ‘कोर्ट ऑफ इन्क्वायरी’चे आदेश; संरक्षणमंत्र्यांकडून दुःख व्यक्त
भारतीय हवाई दलाने अधिकृतपणे या अपघाताला दुजोरा दिला असून, दुर्घटनेचे अचूक कारण शोधण्यासाठी तातडीने ‘कोर्ट ऑफ इन्क्वायरी’ (उच्चस्तरीय चौकशी समिती) स्थापन करण्याचे आदेश दिले आहेत. हवाई दलाने सोशल मीडिया प्लॅटफॉर्म ‘X’ वर पोस्ट करत या चौकशीची माहिती दिली. दरम्यान, संरक्षण मंत्री राजनाथ सिंग यांनीही या घटनेबद्दल तीव्र दुःख व्यक्त केले आहे. शहीद जवानांचे धैर्य आणि त्यांनी देशासाठी दिलेले योगदान सदैव अभिमानाने लक्षात ठेवले जाईल, अशा शब्दांत त्यांनी श्रद्धांजली वाहिली. तसेच, दुःखाच्या या कठीण काळात संपूर्ण देश शोकग्रस्त कुटुंबांच्या पाठीशी खंबीरपणे उभा असल्याचे संरक्षणमंत्र्यांनी म्हटले आहे.
