Gujarat Politics: गुजरातच्या राजकारणात मोठी घटना घडली आहे. राज्यातील भारतीय जनता पक्षाच्या नेतृत्वाखालील सरकारमधील मुख्यमंत्री भूपेंद्र पटेल वगळता, सर्व १६ मंत्र्यांनी आज राजीनामा दिला आहे. ही घटना राज्यातील भाजप मंत्रिमंडळाच्या विस्ताराच्या विचारांदरम्यान घडली आहे. सूत्रांनी दिलेल्या माहितीनुसार, नवीन गुजरात मंत्रिमंडळाचा शपथविधी समारंभ शुक्रवारी दुपारी 12:39 वाजता होणार आहे.
राज्यात आगामी मंत्रिमंडळ विस्तारात अंदाजे 5 वर्तमान मंत्र्यांना कायम ठेवले जाईल, तर काही जुने चेहरे वगळले जाऊ शकतात. यावेळी 16 नवीन चेहऱ्यांना मंत्रिपदी समाविष्ट केले जाण्याची शक्यता आहे. दोन महिला नेत्यांना मंत्रीपदी नियुक्त करण्याचा विचार आहे. नवीन मंत्रिमंडळात एकूण 20 ते 23 सदस्यांचा समावेश असेल, असा अंदाज वर्तवण्यात येत आहे.
हेही वाचा –ठाणे महापालिका निवडणुकीत महायुतीत तणाव! भाजपकडून स्वबळावर लढवण्याची तयारी सुरु
अलीकडेच, पंतप्रधान नरेंद्र मोदी आणि गृहमंत्री अमित शहा यांनी मुख्यमंत्री भूपेंद्र पटेल, प्रदेश पक्षाध्यक्ष आणि वरिष्ठ नेत्यांसह एक मोठी बैठक घेतली होती. या बैठकीत मंत्रिमंडळ विस्तार आणि संघटनात्मक भूमिकांमध्ये नवीन चेहऱ्यांचा समावेश यावर चर्चा झाली. सूत्रांनी सांगितले की, पंतप्रधान मोदींना अपेक्षा आहे की नवीन मंत्री लोकांशी जवळचे संबंध प्रस्थापित करतील.
गुजरातच्या मंत्रिमंडळ स्थापनेच्या नियमानुसार, विधानसभेतील 182 सदस्यांपैकी 15 टक्के म्हणजे 27 मंत्री असू शकतात. आतापर्यंत मुख्यमंत्री भूपेंद्र पटेल यांच्या नेतृत्वाखालील मंत्रिमंडळात 17 मंत्री होते, ज्यात आठ कॅबिनेट दर्जाचे आणि आठ राज्यमंत्री होते. यंदा माजी राज्यमंत्री जगदीश विश्वकर्मा यांनी केंद्रीय मंत्री सी.आर. पटेल यांची जागा घेऊन गुजरात भाजपचे प्रदेश अध्यक्ष म्हणून कार्यभार स्वीकारला आहे. मुख्यमंत्री भूपेंद्र पटेल यांनी 12 डिसेंबर 2022 रोजी दुसऱ्यांदा गुजरातचे मुख्यमंत्री म्हणून शपथ घेतली होती. सध्या सर्वांचे लक्ष नवीन मंत्रिमंडळाच्या घोषणेकडे लागले आहे.
