Shambhavi Pathak: राज्याचे उपमुख्यमंत्री अजित पवार यांच्या निधनाने अवघा महाराष्ट्र सुन्न झाला आहे. बारामती विमानतळाजवळ लँडिंग करताना झालेल्या या भीषण दुर्घटनेत अजितदादांसह विमानातील सर्व पाच जणांचा अंत झाला. या विमानाचे नियंत्रण ज्यांच्या हाती होते, त्या कॅप्टन शांभवी पाठक आणि मुख्य पायलट सुमित कपूर यांच्या अनुभवावर अखेर नियतीने घाला घातला.
आर्मी ऑफिसरची कन्या अन् १५०० तासांचा अनुभव
कॅप्टन शांभवी पाठक या एक अत्यंत हुशार आणि जिद्दी वैमानिक होत्या. मूळ मुंबईच्या असलेल्या शांभवी यांचे वडील सैन्य दलात (Indian Army) अधिकारी पदावर कार्यरत होते, त्यामुळे देशसेवेचे बाळकडू त्यांना घरातूनच मिळाले होते. शांभवी यांना १५०० तासांहून अधिक काळ विमान उड्डाणाचा प्रदीर्घ अनुभव होता. त्यांच्या सोबत असलेले मुख्य पायलट कॅप्टन सुमित कपूर हे तर १६,००० तासांच्या अनुभवाचा डोंगर पाठीशी असलेले दिग्गज वैमानिक होते. मात्र, इतका मोठा अनुभव असतानाही बारामतीतील त्या ‘काळ्या’ क्षणी तांत्रिक दोष किंवा निसर्गाचा कोप वरचढ ठरला.
शिक्षण आणि व्यावसायिक प्रवास
शांभवी पाठक यांनी आपले करिअर अतिशय मेहनतीने घडवले होते:
- पदवी: मुंबई विद्यापीठातून एरोनॉटिक्स आणि एव्हिएशन सायन्समध्ये त्यांनी बी.एससी. पूर्ण केले होते.
- आंतरराष्ट्रीय प्रशिक्षण: २०१८-१९ मध्ये न्यूझीलंड इंटरनॅशनल कमर्शियल पायलट अकॅडमीतून त्यांनी विशेष प्रशिक्षण घेतले होते.
- प्रोफेशनल करिअर: २०२२ पासून त्या ‘VSR व्हेंचर प्रायव्हेट लिमिटेड’मध्ये फर्स्ट ऑफिसर म्हणून कार्यरत होत्या. त्यांना स्पाइसजेट आणि जेट ओरिएंटेशन ट्रेनिंगचे (A-320 विमान) मानांकित परवानेही मिळाले होते.
विमानात कोण-कोण होते?
या दुर्घटनेत विमानाचा स्फोट होऊन विमानातील सर्वांचाच होरपळून मृत्यू झाला. मृतांची यादी खालीलप्रमाणे आहे: १. अजित पवार (उप उपमुख्यमंत्री) २. कॅप्टन सुमित कपूर (मुख्य पायलट) ३. कॅप्टन शांभवी पाठक (सह-पायलट) ४. विदीप जाधव (सुरक्षा रक्षक) ५. पिंकी माळी (क्रू मेंबर)
एका कर्तव्यदक्ष नेत्यासोबतच राज्याने आज शांभवी पाठक आणि सुमित कपूर यांच्या रूपाने दोन अत्यंत कुशल वैमानिक गमावले आहेत. या भीषण अपघातामुळे महाराष्ट्राच्या विमान वाहतूक क्षेत्रात आणि राजकीय वर्तुळात कधीही भरून न येणारी पोकळी निर्माण झाली आहे.
