Ajit Pawar Plane Crash: उपमुख्यमंत्री अजित पवार यांच्या अकाली निधनाने महाराष्ट्र सुन्न झाला आहे. आगामी निवडणुकांच्या रणधुमाळीत सभांचा धडाका लावण्यासाठी निघालेल्या अजितदादांच्या विमानाला बारामती विमानतळावर उतरताना काळाने गाठले. सकाळी ८:५० च्या सुमारास झालेल्या या भीषण दुर्घटनेत अजितदादांसह विमानातील एकूण पाच जणांचा जागीच मृत्यू झाला असून, मृतांची अधिकृत नावे आता समोर आली आहेत.
विमानातील ‘त्या’ पाच जणांची नावे
या दुर्घटनेत अजितदादांसोबत सावलीसारखे राहणारे त्यांचे सुरक्षारक्षक आणि वैमानिक दलाचाही अंत झाला आहे: १. अजित पवार (उपमुख्यमंत्री, महाराष्ट्र) २. विदीप जाधव (खासगी सुरक्षारक्षक, मुंबई) ३. सुमित कपूर (मुख्य पायलट कॅप्टन) ४. संभवी पाठक (सह-पायलट कॅप्टन) ५. पिंकी माळी (फ्लाईट अटेंडंट).
निवडणुकीच्या रणधुमाळीत काळाचा घाला
अजित पवार आज पूर्णपणे ॲक्शन मोडमध्ये होते. आगामी जिल्हा परिषद आणि पंचायत समिती निवडणुकीच्या प्रचारासाठी त्यांच्या आज एकूण चार सभांचे नियोजन होते. पायाला भिंगरी बांधल्यासारखा प्रचार करणाऱ्या दादांनी बारामतीतील सभेसाठी मुंबईहून उड्डाण घेतले होते. मात्र, सभेच्या ठिकाणी पोहोचण्यापूर्वीच विमान कोसळल्याने महाराष्ट्राने आपला ‘कार्यसम्राट’ नेता गमावला आहे.
पवार कुटुंबावर दुःखाचा डोंगर; सुप्रिया सुळे भावूक
या घटनेने पवार कुटुंब पूर्णपणे कोलमडून गेले आहे. आपल्या लाडक्या भावाच्या निधनानंतर खासदार सुप्रिया सुळे यांनी व्हॉट्सअॅप स्टेटसवर “Devastated” (उद्ध्वस्त) असा शब्द लिहून आपल्या तीव्र वेदना व्यक्त केल्या आहेत. विशेष म्हणजे, अजितदादांचे सुपुत्र जय पवार यांचा विवाह अवघ्या दोन महिन्यांपूर्वी (५ डिसेंबरला) बहरीनमध्ये पार पडला होता. घरात लग्नाचा आनंद ओसरण्यापूर्वीच या घटनेने संपूर्ण कुटुंबावर दुःखाचा डोंगर कोसळला आहे.
बारामतीमध्ये कडकडीत बंद
आपल्या लाडक्या लोकनेत्याला श्रद्धांजली वाहण्यासाठी बारामतीकरांनी आज आपले व्यवहार स्वयंस्फूर्तीने बंद ठेवले आहेत. बारामतीसह संपूर्ण देशभरातून अजितदादांच्या निधनावर हळहळ व्यक्त केली जात असून, एका कार्यक्षम प्रशासकीय पर्वाचा असा दुर्दैवी शेवट झाल्याने सर्वत्र शोककळा पसरली आहे.
