Pune Crime: कोंढवे धावडे येथील एका ज्येष्ठ बांधकाम व्यावसायिकाची फसवणूक केल्याप्रकरणी कुख्यात गुंड सूर्यकांत राणोजी आंदेकर उर्फ बंडू आंदेकर (Bandu Andekar) आणि त्याच्या साथीदारांवर उत्तमनगर पोलीस ठाण्यात गुन्हा दाखल करण्यात आला आहे. २००९ ते २०२४ या कालावधीत घडलेल्या या प्रकरणात बनावट दस्तऐवज तयार करून फ्लॅट विक्री व आर्थिक अपहार केल्याचे समोर आले आहे.
या फसवणूक प्रकरणात बंडू आंदेकर याच्यासह महेश रामचंद्र तिखे आणि अविनाश रामचंद्र पवार यांचा भाऊ अशा तिघांविरोधात गुन्हा दाखल करण्यात आला आहे. पीडित व्यावसायिक (वय ७०) यांनी याबाबत तक्रार दाखल केली असून, त्यांनी स्वतःच्या मालकीची ५५ आर क्षेत्रफळाची जमीन विश्वासाने आरोपींना बांधकामासाठी दिली होती.
हेही वाचा –आमदार बापू पठारेंना मारहाण प्रकरण; बंडू खांदवेसह 10 ते 15 जणांवर गुन्हा दाखल
बांधकाम पूर्ण झाल्यानंतर तक्रारदारांची कोणतीही संमती न घेता संबंधितांनी सदर फ्लॅट विक्री करून मिळालेली रक्कम आपआपसात वाटून घेतली. त्याचबरोबर, बनावट खरेदी व्यवहार दाखवून दस्तऐवज तयार करण्यात आले व त्याच्या आधारे बेकायदेशीरपणे कर्जही उचलण्यात आले. तसेच, तक्रारदारांच्या मालमत्तेवर बेकायदेशीर ताबा मिळवण्याचाही प्रयत्न केल्याचे उघड झाले आहे. सदर प्रकरणी उत्तमनगर पोलीस अधिक तपास करत आहेत.
