Kolhapur Crime News: कोल्हापूर व तासगावमधून अत्यंत धक्कादायक बातमी समोर आली आहे. दारूच्या व्यसनात बुडालेल्या मुलांनी स्वतःच्या जन्मदात्या आईचा जीव घेतल्याच्या दोन वेगवेगळ्या पण थरकाप उडवणाऱ्या घटना महाराष्ट्रात समोर आल्या आहेत. केवळ दारूसाठी पैसे न दिल्याच्या कारणावरून संतप्त मुलांनी आपल्या आईचा निर्दयपणे खून केला आहे. एक घटना कोल्हापुरातील तर दुसरी तासगाव येथील असून, दोन्ही प्रकरणांत आरोपींना अटक करण्यात आली आहे.
पैशासाठी सावत्र आईची खलबत्त्याने ठेचून हत्या
राजेंद्रनगर येथील भारतनगरमध्ये बुधवारी (दि. १५) सकाळी घडलेल्या घटनेने संपूर्ण परिसर हादरून गेला. विजय अरुण निकम (वय ३५) या दारूच्या आहारी गेलेल्या तरुणाने आपल्या सावत्र आई सावित्रीबाई निकम (वय ५३) यांचा खलबत्त्याने डोके ठेचून जागीच खून केला. दारूसाठी पैसे मागितल्यावर त्यांनी नकार दिल्याचा राग मनात धरून हा भयानक हल्ला करण्यात आला. सावित्रीबाई महाद्वार रोड परिसरात किरकोळ वस्तू विकून उदरनिर्वाह करत होत्या. विजय सेंट्रिंग आणि डिजिटल बोर्ड पेस्टिंगचे काम करायचा, मात्र दारूच्या व्यसनामुळे घरात सतत कलह होत असे. त्याच्या त्रासाला कंटाळून पत्नी व दोन मुली विजापूर येथे निघून गेल्या होत्या.
हेही वाचा – हृदयद्रावक! सासरच्या जाचाला कंटाळून बीडमधील तरुणाची आत्महत्या
घटनेनंतर विजयने आपल्या बहिणीला फोन करून आईचा खून केला असे सांगितले. माहिती मिळताच राजारामपुरी पोलीस घटनास्थळी पोहोचले व त्याला ताब्यात घेतले. आरोपीच्या चेहऱ्यावर पश्चातापाचा लवलेशही नव्हता, असे प्रत्यक्षदर्शी सांगतात. रोहिणी पोर्लेकर (वय २९) यांनी दिलेल्या तक्रारीवरून गुन्हा नोंदवण्यात आला.
तासगावात तलवारीने वार करत आईचा जागीचा खून
दुसरी धक्कादायक घटना तासगावमधील इंदिरानगर झोपडपट्टी भागात मंगळवारी (दि. १४) रात्री घडली. दारूच्या नशेत जगन चरण पवार (वय ४४) याने किरकोळ कारणावरून आई शांताबाई चरण पवार (वय ७०) यांच्याशी वाद घातला. वाद विकोपाला गेल्यावर त्याने घरातील तलवार उचलून आईवर वार केला. या क्रूर हल्ल्यात त्यांचा जागीच मृत्यू झाला. घटनेची माहिती मिळताच पोलीस उपनिरीक्षक राजू अन्नछत्रे यांच्या मार्गदर्शनाखाली तासगाव पोलिसांनी घटनास्थळी धाव घेत आरोपीला अटक केली. रात्री उशिरापर्यंत गुन्हा नोंदवण्याची प्रक्रिया सुरू होती.
या दोन्ही घटनांनी कोल्हापूर आणि तासगाव परिसरात तीव्र संताप आणि हळहळ व्यक्त केली जात आहे. आईचा असा अंत, तोही स्वतःच्या मुलाच्या हातून, हे समाजातील विघटन आणि व्यसनाधीनतेचं भयावह चित्र उभं करत आहे. पोलीस या दोन्ही प्रकरणांचा अधिक तपास करत आहेत.
