First Woman Deputy CM : महाराष्ट्राच्या सत्ताकारणात आज एका सुवर्ण अध्यायाची नोंद झाली आहे. राष्ट्रवादी काँग्रेसचे नेते दिवंगत अजित पवार यांच्या निधनामुळे निर्माण झालेली राजकीय पोकळी भरून काढत, त्यांच्या पत्नी सुनेत्रा पवार यांनी आज राज्याच्या उपमुख्यमंत्रिपदाची अधिकृत शपथ घेतली. या नियुक्तीमुळे महाराष्ट्राच्या इतिहासात पहिल्यांदाच एका महिलेने हे महत्त्वपूर्ण पद भूषवले आहे.
साधेपणाने पार पडला शपथविधी
राजभवनातील ‘दरबार हॉल’मध्ये आज शनिवारी एका अत्यंत साध्या सोहळ्यात हा शपथविधी संपन्न झाला. राज्यपाल आचार्य देवव्रत यांनी सुनेत्रा पवार यांना पद आणि गोपनीयतेची शपथ दिली. यावेळी राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे प्रामुख्याने उपस्थित होते. कौटुंबिक पाठबळ म्हणून सुनेत्रा पवार यांचे धाकटे चिरंजीव जय पवार त्यांच्यासोबत होते.
अकस्मात निधनानंतरची राजकीय अपरिहार्यता
२८ जानेवारी रोजी झालेल्या भीषण विमान अपघातात अजित पवार यांच्या अकाली निधनामुळे राज्यासह राष्ट्रवादी काँग्रेसवर मोठा आघात झाला होता. पक्षाचे नेतृत्व आणि उपमुख्यमंत्रिपदाची धुरा कोणाकडे द्यायची, असा पेच निर्माण झाला होता. ३० जानेवारीपासून सुरू असलेल्या मॅरेथॉन बैठकांनंतर, पार्थ आणि जय पवार या दोघांनीही आपल्या मातोश्रींच्या नावावर शिक्कामोर्तब केले. कुटुंबाच्या आणि पक्षाच्या आग्रहानंतर सुनेत्रा पवारांनी ही मोठी जबाबदारी स्वीकारण्यास होकार दिला.
