Ashok Kharat: नाशिकच्या कॅनडा कॉर्नर भागात ‘ओकस प्रॉपर्टीज’च्या नावाने कार्यालय चालवणारा अशोक खरात हा अंकशास्त्र आणि तंत्र-मंत्राचा वापर करून लोकांना जाळ्यात ओढत असे. २०१९ मध्ये, २८ वर्षीय पीडित तरुणीचे लग्न जुळत नसल्याने तिच्या नातेवाईकांनी खरातची भेट घेतली होती. स्वतःकडे दैवी शक्ती असल्याचा बनाव रचून खरातने या कुटुंबाचा विश्वास संपादन केला. लग्न जमवून देण्याच्या नावाखाली त्याने पीडितेला महागडे ‘रत्न’ परिधान करण्यास भाग पाडले आणि विधींच्या बहाण्याने मोठ्या प्रमाणावर पैसे उकळले.
भयाचा सापळा आणि पाशवी अत्याचार
खरातने पीडितेच्या मनात विधींविषयी प्रचंड भीती निर्माण केली होती. “खडा काढल्यास लग्न मोडेल” किंवा “विधी न केल्यास पतीचा जीव जाईल,” अशा धमक्या देऊन त्याने तिला मानसिक गुलाम बनवले. २०२२ मध्ये प्रसादातून गुंगीचे औषध देऊन त्याने पहिल्यांदा तिच्यावर अत्याचार केला. धक्कादायक म्हणजे, २०२३ मध्ये पीडितेच्या पतीला कार्यालयाबाहेर बसवून खरातने आतमध्ये तिचे लैंगिक शोषण केले, ज्यामध्ये तिला गंभीर दुखापत होऊन रक्तस्त्रावही झाला होता. नोव्हेंबर २०२२ ते डिसेंबर २०२५ या काळात चारित्र्यहनन करण्याची भीती दाखवून त्याने हे अत्याचाराचे सत्र सुरूच ठेवले.
पोलीस कारवाई आणि डिजिटल पुराव्यांचा उलगडा
१५ मार्च २०२६ रोजी पीडितेने धीर धरून सर्व प्रकार आपल्या कुटुंबाला सांगितला, त्यानंतर १७ मार्चला सरकारवाडा पोलीस ठाण्यात गुन्हा दाखल करण्यात आला. पोलीस आयुक्त संदीप कर्णिक यांच्या मार्गदर्शनाखाली पोलिसांनी तत्काळ कारवाई करत ‘तृप्तबाला’ बंगल्यावर छापा टाकून खरातला अटक केली. तपासादरम्यान पोलिसांच्या हाती एक पेनड्राईव्ह लागला असून, त्यातील आक्षेपार्ह व्हिडिओंवरून खरातने इतरही अनेक महिलांचे शोषण केल्याची दाट शक्यता वर्तवली जात आहे.
बड्या हस्तींशी संबंध आणि तपासाची व्याप्ती
अशोक खरातचे संबंध केवळ सामान्य लोकांशीच नव्हे, तर राजकीय नेते, उद्योजक आणि उच्चपदस्थ अधिकाऱ्यांशीही असल्याचे तपासात समोर येत आहे. अंधश्रद्धा निर्मूलन समितीच्या (अंनिस) मते, अनेक उच्चशिक्षित महिलाही त्याच्या या छुप्या जाळ्यात अडकल्या असण्याची भीती आहे. न्यायालयाने आरोपीला २४ मार्चपर्यंत पोलीस कोठडी सुनावली असून, पोलीस आता या प्रकरणाच्या मुळाशी जाण्याचा प्रयत्न करत आहेत.
