Petrol Diesel Price: जागतिक स्तरावरील राजकीय अस्थिरता आणि युद्धाच्या छायेमुळे आज, २३ मार्च रोजी भारतातील पेट्रोल-डिझेलच्या किमतींमध्ये मोठी उलथापालथ पाहायला मिळत आहे. विशेषतः मध्य पूर्वेतील वाढता तणाव आणि अमेरिका-इराण यांच्यातील संघर्षामुळे कच्च्या तेलाच्या पुरवठा साखळीवर विपरीत परिणाम होण्याची शक्यता निर्माण झाली आहे. या जागतिक घडामोडींचा थेट परिणाम भारतीय बाजारपेठेवर झाला असून, काही राज्यांमध्ये इंधनाचे दर कडाडले आहेत, तर काही ठिकाणी सर्वसामान्यांना अल्पसा दिलासा मिळाला आहे.
कच्च्या तेलाच्या किमतीत विक्रमी वाढ
आंतरराष्ट्रीय बाजारपेठेत कच्च्या तेलाने धोक्याची पातळी ओलांडली आहे. अमेरिकेने इराणला दिलेल्या ४८ तासांच्या अल्टिमेटमनंतर जागतिक तेल व्यापारात मोठी खळबळ उडाली असून, ब्रेंट क्रूडचा दर प्रति बॅरल ११२.१७ डॉलरवर पोहोचला आहे. फेब्रुवारीच्या अखेरीस ७२.४८ डॉलरवर असणारे कच्चे तेल अवघ्या काही आठवड्यांत १०० डॉलरच्या पार गेल्याने जागतिक अर्थव्यवस्था हादरली आहे. या ऐतिहासिक दरवाढीचा बोजा आता ग्राहकांच्या खिशावर पडू लागला आहे.
महाराष्ट्रात किमतीत किंचित घट, तर इतर राज्यांत महागाई
राज्यानुसार इंधनाच्या दरात मोठी तफावत दिसून येत आहे. उत्तर प्रदेश, झारखंड, गोवा आणि केरळ या राज्यांमध्ये पेट्रोल-डिझेलच्या दरात वाढ झाली आहे. याउलट, महाराष्ट्र आणि गुजरातच्या जनतेला थोडा दिलासा मिळाला आहे. महाराष्ट्रामध्ये पेट्रोलच्या दरात ७ पैसे आणि डिझेलमध्ये ९ पैशांची घट नोंदवण्यात आली आहे. सध्या महाराष्ट्रात पेट्रोलचा सरासरी दर १०५.४३ रुपये आणि डिझेलचा दर ९१.९४ रुपये इतका आहे. कर्नाटक आणि मध्य प्रदेशातही इंधनाचे दर काही अंशी कमी झाले आहेत.
