Deool Band 2 Collection : मराठी चित्रपटसृष्टीत सध्या देऊळ बंद २ या चित्रपटाची जोरदार चर्चा सुरू आहे. दिग्दर्शक आणि अभिनेते प्रवीण तरडे यांच्या या चित्रपटाने बॉक्स ऑफिसवर दमदार कामगिरी करत ५० कोटींचा टप्पा पार केला असून आता १०० कोटींच्या दिशेने यशस्वी वाटचाल सुरू केली आहे.
शेतकऱ्यांच्या आयुष्याशी निगडित कथा आणि स्वामी भक्तीचा संगम असलेल्या या चित्रपटाला प्रेक्षकांचा मोठा प्रतिसाद मिळत आहे. चित्रपटात ज्येष्ठ अभिनेते मोहन जोशी यांनी स्वामींची भूमिका साकारली असून अभिनेत्री स्नेहल तरडे यांनी शेतकरी महिलेची भूमिका साकारली आहे.
उपलब्ध आकडेवारीनुसार, प्रदर्शनाच्या १३व्या दिवशी चित्रपटाने १,९२५ शोजमधून २.३५ कोटी रुपयांची कमाई केली. त्यामुळे चित्रपटाची एकूण नेट कमाई ४९ कोटी रुपयांवर पोहोचली असून ग्रॉस कलेक्शन ५७.६३ कोटी रुपयांपर्यंत गेले आहे. विशेष म्हणजे, हा चित्रपट राजा शिवाजी या बहुचर्चित चित्रपटालाही जोरदार टक्कर देताना दिसत आहे.
पहिल्या आठवड्यापासूनच ‘देऊळ बंद २’ने सातत्याने कोटींच्या घरात कमाई केली आहे. दुसऱ्या आठवड्यातही चित्रपटाची पकड कायम राहिल्याने आगामी दिवसांत १०० कोटींचा टप्पा गाठण्याची शक्यता व्यक्त केली जात आहे.
दरम्यान, चित्रपटाच्या शेवटी दाखवण्यात आलेल्या दृश्यामुळे ‘देऊळ बंद ३’चीही जोरदार चर्चा रंगली आहे. अभिनेता गश्मीर महाजनी याची राघव शास्त्री म्हणून झालेली एंट्री प्रेक्षकांच्या पसंतीस उतरली आहे. ‘देऊळ बंद ३ : आत्मनिर्भर भारत’ या नावाने पुढचा भाग येणार असल्याचे संकेत चित्रपटाच्या शेवटी देण्यात आले आहेत.
‘मुळशी पॅटर्न’, ‘सरसेनापती हंबीरराव’, ‘धर्मवीर’ आणि ‘धर्मवीर २’नंतर प्रवीण तरडेंच्या आणखी एका चित्रपटाने बॉक्स ऑफिसवर दमदार यश मिळवल्याचे चित्र पाहायला मिळत आहे.
