Gold Price Today: मल्टी कमोडिटी एक्सचेंज (MCX) वर सोमवारी सोन्याच्या वायद्यांमध्ये किरकोळ घसरण झाली, तर चांदी थोड्या वाढीसह बंद झाली. जागतिक बाजारातील कमकुवत कल आणि अमेरिकन फेडरल रिझर्व्हच्या आगामी बैठकीबद्दल गुंतवणूकदारांची सावधगिरी यामागचे प्रमुख कारण ठरले. प्राप्त माहितीनुसार, MCX वर ऑक्टोबर डिलिव्हरीसाठी सोन्याचा भाव 148 रुपयांनी घसरून 1,09,222 रुपये प्रति 10 ग्रॅम झाला. डिसेंबर डिलिव्हरीसाठी करारही 111 रुपये नी कमी होऊन 1,10,323 प्रति 10 ग्रॅमवर बंद झाला.
दरम्यान, चांदीच्या किमतीत सौम्य वाढ दिसली. डिसेंबर डिलिव्हरीसाठी चांदीचा करार 121 रुपयांनी वाढून 1,28,959 प्रति किलो झाला. मार्च 2026 डिलिव्हरीसाठीचा करारही 41 रुपयांनी वाढून 1,30,311 प्रति किलोवर पोहोचला. बाजारातील तज्ज्ञांचे म्हणणे आहे की सध्या गुंतवणूकदार यूएस फेडरल रिझर्व्हच्या महत्त्वाच्या धोरण बैठकीकडे पाहत आहेत. रिलायन्स सिक्युरिटीजचे वरिष्ठ संशोधन विश्लेषक जिगर त्रिवेदी यांच्या मते, अमेरिकन कामगार बाजारपेठेतील कमकुवतपणामुळे फेड दरात 25 बेसिस पॉइंट्सची कपात करू शकते, अशी अपेक्षा आहे. काही विश्लेषकांचा अंदाज आहे की ही मवाळ भूमिका 2025 पर्यंत टिकू शकते.
आंतरराष्ट्रीय बाजारातही सोन्याच्या दरात घसरण झाली. COMEX वर डिसेंबर डिलिव्हरीसाठी सोन्याचे वायदे 0.10% घसरून 3,682.72 डॉलर प्रति औंस, तर चांदीचे वायदे 0.25% घसरून 42.72 डॉलर प्रति औंस झाले. विश्लेषकांच्या मते, फेड बैठकीपूर्वी व्यापारी नवीन पोझिशन्स घेण्याचे टाळत असल्याने सोन्याचे व्यवहार मर्यादित श्रेणीत राहण्याची शक्यता आहे. अमेरिका-चीन व्यापार चर्चा आणि फेड गव्हर्नर लिसा कुक यांच्यावरील प्रशासनाचे आवाहन हे घटकही बाजारातील अस्थिरतेला कारणीभूत ठरत आहेत.
