CBSE 2026 Board Exams: केंद्रीय माध्यमिक शिक्षण मंडळाने (CBSE) 2026 दहावी आणि बारावीच्या बोर्ड परीक्षांचे अधिकृत वेळापत्रक जाहीर केले आहे. या परीक्षांमध्ये देशभरातून सुमारे 45लाख विद्यार्थी सहभागी होणार आहेत, आणि दोन्ही वर्गांसाठी स्वतंत्र नियमानुसार परीक्षा घेण्यात येणार आहेत.
या वर्षाचे वैशिष्ट्य म्हणजे दहावीच्या विद्यार्थ्यांना आपले गुण सुधारण्याची नवी संधी मिळणार आहे. यानुसार बोर्डाने निर्णय घेतला आहे की आता दहावीची परीक्षा वर्षातून दोन वेळा घेतली जाईल. पहिली नियमित परीक्षा झाल्यानंतर विद्यार्थ्यांना दुसऱ्या परीक्षेत बसण्याची मुभा असेल. ज्या विद्यार्थ्यांना आपले निकाल समाधानकारक वाटणार नाही, त्यांना या दुसऱ्या संधीचा लाभ मिळणार आहे.
तात्पुरत्या वेळापत्रकानुसार परीक्षा 17 फेब्रुवारी 2026 पासून सुरू होणार आहे. हे वेळापत्रक सीबीएसईने त्यांच्या संकेतस्थळावर प्रसिद्ध केले असून विद्यार्थ्यांनी अधिकृत माहितीसाठी तिथे भेट देणे गरजेचे आहे. 17 फेब्रुवारीला दहावीची परीक्षा गणित विषयाने सुरू होणार आहे. तर बारावीच्या परीक्षेला त्याच दिवशी सुरुवात होत असून बायोटेक्नॉलॉजी, आंत्रप्रेन्युअरशिप आणि शॉर्टहँड या विषयांचे पेपर प्रारंभी ठेवण्यात आले आहेत.
