Pune MHADA Lottery: ज्या नागरिकांची नुकत्याच झालेल्या ४,१८६ घरांच्या सोडतीत संधी हुकली आहे, त्यांच्यासाठी एक आनंदाची बातमी समोर आली आहे. पुणे म्हाडाचे सभापती शिवाजीराव आढळराव पाटील यांनी आगामी मार्च महिन्यात आणखी ३,००० घरांची नवीन सोडत काढण्याचे संकेत दिले आहेत. घरांच्या वाढत्या मागणीला प्रतिसाद देत प्रशासनाने तातडीने ही पावले उचलली आहेत.
कोठे मिळणार नवीन घरे?
पुणे आणि आसपासच्या परिसरातील गृहस्वप्न पूर्ण करण्यासाठी म्हाडाने विविध ठिकाणचे प्रकल्प सज्ज केले आहेत:
- ताथवडे (पुणे): येथील गृहप्रकल्पाचे ८० टक्के काम पूर्ण झाले असून, लवकरच ७५० निवासी व अनिवासी गाळे विक्रीसाठी उपलब्ध होतील.
- शिरूर व खराबवाडी: शिरूरमध्ये ५७४ सदनिका तर खराबवाडीमध्ये १९४ व्यापारी गाळ्यांचे काम अंतिम टप्प्यात आहे.
- विस्तार: म्हाळुंगे, सोलापूर, बारामती आणि पुरंदर या ठिकाणी देखील म्हाडाचे भव्य गृहप्रकल्प वेगाने उभे राहत आहेत.
बिल्डरांच्या जास्तीच्या वसुलीला चाप; पार्किंगचा हक्क मिळणार
खासगी विकासकांकडून राबवल्या जाणाऱ्या ‘२० टक्के योजने’मध्ये अनेक बिल्डरांनी नागरिकांकडून अवाजवी शुल्क आकारल्याच्या तक्रारी प्राप्त झाल्या होत्या. यावर म्हाडाने कठोर कारवाई करत अनेक प्रकल्पांमधील वाढीव शुल्क रद्द करण्यास भाग पाडले आहे. विशेष म्हणजे, घरासोबत प्रत्येक विजेत्याला ५० टक्के पार्किंग मिळणे बंधनकारक असल्याचे आदेश आढळराव पाटील यांनी दिले आहेत. याशिवाय, चंदनगर-खराडी येथील अतिक्रमण झालेली १५ गुंठे जमीन म्हाडाने यशस्वीपणे ताब्यात घेतली आहे.
अचूक आणि पारदर्शक प्रक्रिया: अशा प्रकारे करा नोंदणी
म्हाडाच्या सोडतीमध्ये होणारा वशिलेबाजीचा काळ आता इतिहास झाला आहे. उपाध्यक्ष अनिल वानखडे आणि मुख्याधिकारी राहुल साकोरे यांनी दिलेल्या माहितीनुसार, ही संपूर्ण प्रक्रिया मानवी हस्तक्षेप विरहित आहे.
