नवी मुंबई: नवी मुंबई आंतरराष्ट्रीय विमानतळाच्या (NMIA) पहिल्या टप्प्याचे उद्घाटन पंतप्रधान नरेंद्र मोदी यांच्या हस्ते 30 सप्टेंबर रोजी होण्याची शक्यता आहे. हिंदुस्तान टाइम्सने दिलेल्या वृत्तानुसार, पंतप्रधान मोदी सप्टेंबरच्या अखेरीस मुंबई भेटीदरम्यान मेट्रो लाईन 3 च्या वरळी-कफ परेड मार्गाचे उद्घाटनही करणार आहेत. नगरविकास अधिकाऱ्यांनी सांगितले की, काळबादेवी आणि गिरगाव ही दोन मेट्रो स्टेशन अद्याप तयार नसली तरी उद्घाटनानंतर प्रवाशांसाठी चारपैकी दोन प्रवेशद्वार खुले राहतील.
विमानतळाची वैशिष्ट्ये:
- दोन समांतर धावपट्टे आणि अत्याधुनिक टर्मिनल
- हरित पायाभूत सुविधा व 37 मेगावॅट अक्षय ऊर्जा वापर
- साइटवरील सर्व वाहने इलेक्ट्रिक किंवा पर्यायी इंधनावर चालणारी
- 360-डिग्री बारकोड स्कॅनिंगसह जगातील सर्वात जलद बॅगेज हँडलिंग सिस्टम
- रस्ता, रेल्वे, जलमार्ग व मेट्रोद्वारे सोयीस्कर कनेक्टिव्हिटी
- अटल सेतू, कोस्टल रोड व प्रस्तावित एलिव्हेटेड कॉरिडॉरमुळे सहज पोहोच
नवी मुंबई आंतरराष्ट्रीय विमानतळाची संकल्पना अनेक दशकांपूर्वी मांडली गेली होती. 2018 मध्ये पंतप्रधान नरेंद्र मोदी यांच्या हस्ते भूमिपूजन झाले. मात्र कोविड-19 महामारीमुळे जवळपास अडीच वर्षे काम ठप्प राहिले, तसेच महाविकास आघाडी सरकारच्या कार्यकाळातही उशीर झाला. आता शेवटी 30 सप्टेंबर रोजी NMIA प्रवाशांसाठी सुरू होण्याची शक्यता आहे, ज्यामुळे मुंबई आणि उपनगरी भागातील हवाई वाहतुकीवरील ताण मोठ्या प्रमाणात कमी होणार आहे.
