मुंबई: मुंबईच्या दादर येथील शिवाजी पार्क परिसरात आज सकाळी तणावाचे वातावरण निर्माण झाले. मीनाताई बाळासाहेब ठाकरे यांच्या पुतळ्यावर अज्ञात व्यक्तीने लाल रंग फेकल्याची घटना उघडकीस आली आहे. घटनेची माहिती मिळताच शिवसैनिकांनी तातडीने पुतळ्याजवळ धाव घेतली आणि परिसर स्वच्छ करण्यास सुरुवात केली.
पोलिसांनी सांगितले की, सीसीटीव्ही फुटेजमध्ये एका व्यक्तीची हालचाल दिसून आली असून त्याचा शोध सुरू आहे. हा प्रकार सकाळी 6.10 नंतर घडल्याचे प्राथमिक तपासात स्पष्ट झाले आहे. अद्याप आरोपीची ओळख पटलेली नाही. स्थानिक आमदार आणि खासदार घटनास्थळी पोहोचले असून, ठाकरे गटाकडून या प्रकरणाचा तीव्र निषेध करण्यात आला आहे.
Ayush Komkar Case : आयुष कोमकर खून प्रकरणात पिस्तूल कोणी पुरवले? खरा मास्टरमाइंड समोर?
दरम्यान, खासदार अनिल देसाई यांनी या घटनेवर तीव्र प्रतिक्रिया देताना म्हटले की, अशा भ्याड प्रवृत्तीच्या लोकांना कधीच योग्य संस्कार मिळाले नसावेत. पोलिस त्यांचा शोध घेत आहेत. त्यांनी सरकारवर प्रश्नचिन्ह उपस्थित करत सांगितले की, अशा घटनांना आळा घालण्यात यंत्रणा अपयशी ठरत आहे. आज घडलेली घटना ही निषेधाच्या पलीकडे जाणारी आहे. हे सरकारच्या अपयशाचे स्पष्ट उदाहरण आहे. आम्ही आमच्या पद्धतीने कारवाई करत असून याची माहिती उद्धव ठाकरेंनाही देण्यात आली आहे, असेही देसाई यांनी सांगितलं.
अनिल देसाई पुढे म्हणाले की, भेकड आणि समाजकंटक यांना योग्य प्रत्युत्तर मिळेल. सध्या तपास सुरू असून घटनास्थळावरील लाल रंग हटवण्यात आला आहे आणि संपूर्ण परिसर स्वच्छ करण्यात आला आहे. मुंबई सुरक्षित नाही, सरकार काय करतंय? केवळ कार्यक्रमांमध्ये व्यस्त आहे, अशी टीका करत त्यांनी या घटनेवर निषेध नोंदवला.
या घटनेनंतर शिवसैनिक मोठ्या संख्येने परिसरात जमले होते. त्यांनी पुतळ्याची साफसफाई केली तसेच सरकारवर टीकास्त्र सोडले. स्थानिक आमदार महेश सावंत यांनीही घटनेची माहिती देत सांगितले की, दुपारपर्यंत आरोपीबाबत ठोस माहिती मिळेल अशी अपेक्षा आहे. दरम्यान, या विटंबनेच्या प्रकाराचा निषेध व्यक्त करण्यासाठी बुलढाणा येथे ठाकरे गटाचे शिवसैनिक आंदोलन करणार असल्याचे समजते.
