Ashok Kharat Case: महिलांच्या लैंगिक शोषण प्रकरणातील मुख्य सूत्रधार अशोक खरात याच्या कृत्यांची व्याप्ती आता वैद्यकीय क्षेत्रापर्यंत पोहोचली आहे. खरातच्या अटकेनंतर रोज नवनवीन खुलासे होत असून, पीडित महिलांना जाळ्यात ओढण्यासाठी आणि गुन्ह्याचा पुरावा नष्ट करण्यासाठी नाशिकमधील काही मोठ्या डॉक्टरांची मदत घेतली गेल्याचा संशय ‘एसआयटी’ने (SIT) व्यक्त केला आहे. यामुळे शहरातील वैद्यकीय वर्तुळात मोठी खळबळ उडाली आहे.
औषधांचा वापर आणि ‘गर्भनिरोधक’ कनेक्शन
पोलीस कोठडीत असलेल्या अशोक खरातची एसआयटीकडून कसून चौकशी सुरू आहे. या तपासात असा संशय व्यक्त केला जात आहे की, जाळ्यात ओढलेल्या महिलांना गर्भधारणा होऊ नये यासाठी खरात त्यांना विशिष्ट प्रकारच्या गर्भनिरोधक गोळ्या किंवा औषधे देत होता. ही प्रतिबंधित औषधे त्याला कोठून उपलब्ध झाली आणि कोणत्या डॉक्टरांनी त्याला ही औषधे पुरवली, याचा शोध आता पोलीस घेत आहेत.
संमोहित करण्यासाठी ड्रग्सचा वापर?
खरात हा केवळ मंत्रतंत्राचा आधार घेत नव्हता, तर महिलांना पूर्णपणे आपल्या नियंत्रणात ठेवण्यासाठी त्यांना काही गुंगीकारक किंवा संमोहित करणारी औषधे (Drugs) दिली जात होती का? असा गंभीर प्रश्न तपासात समोर आला आहे. पीडितेची शुद्ध हरपवण्यासाठी तिला खाण्यापिण्यातून काही विशिष्ट पदार्थ दिले जात होते का, याचीही पडताळणी आता सुरू आहे.
गुन्ह्यात सहभागी असलेल्या नामांकित क्लिनिक आणि हॉस्पिटलचे रेकॉर्ड तपासले जात आहेत. खरातने पीडितेवर मानसिक नियंत्रण मिळवण्यासाठी वापरलेल्या तंत्राचे आणि त्यावेळच्या पीडितेच्या स्थितीचे निरीक्षण पोलिसांनी नोंदवले आहे. जर या प्रकरणात डॉक्टरांचे प्रत्यक्ष किंवा अप्रत्यक्ष सहकार्य असल्याचे निष्पन्न झाले, तर नाशिकमधील काही बड्या डॉक्टरांना अटक होण्याची शक्यता आहे. येत्या काही दिवसांत एसआयटीच्या तपासातून या प्रकरणातील ‘मेडिकल नेक्सस’ उघड होण्याची दाट शक्यता वर्तवली जात आहे. खरातच्या या कृष्णकृत्यामध्ये पांढरपेशी गुन्हेगारही सामील आहेत का, हे पाहणे आता महत्त्वाचे ठरेल.
