Manoj Jarange On Pooja More: महापालिका निवडणुकांच्या रणधुमाळीत सध्या मुद्द्यांच्या राजकारणापेक्षा वैयक्तिक चिखलफेक आणि बदनामीचे सत्र जोरात सुरू आहे. पुण्यातील भाजप उमेदवार पूजा मोरे यांना त्यांच्या जुन्या व्हिडिओंच्या आधारे सोशल मीडियावर लक्ष्य केले जात असल्याबद्दल मराठा आरक्षण आंदोलनाचे नेते मनोज जरांगे पाटील यांनी तीव्र संताप व्यक्त केला आहे. राजकीय विरोध करा, पण महिलांची बदनामी खपवून घेणार नाही, अशा शब्दांत जरांगे यांनी ट्रोलर्सना सुनावले आहे.
राजकारणाची पातळी घसरली; जरांगे पाटलांचे रोखठोक मत
नाशिक दौऱ्यावर असताना माध्यमांशी बोलताना जरांगे पाटील यांनी निवडणुकीतील घसरत्या स्तरावर भाष्य केले. ते म्हणाले की, निवडणुकीत उमेदवाराची धोरणे आणि कार्यपद्धती यावर चर्चा होणे अपेक्षित असताना, केवळ जुने व्हिडिओ उकरून काढून वैयक्तिक बदनामी करणे हे महाराष्ट्राच्या संस्कृतीला शोभा देणारे नाही. विचारधारेची लढाई वैयक्तिक द्वेषापर्यंत जाणे लोकशाहीसाठी घातक असल्याचे त्यांनी स्पष्ट केले.
हेही वाचा – पुण्यातून उमेदवारी अर्ज दाखल; ट्रोलिंगनंतर रडत-रडत अर्ज माघार अन् राज्यभर चर्चा, कोण आहेत पूजा मोरे?
ट्रोलर्सना इशारा
पूजा मोरे यांच्या व्हायरल व्हिडिओंवरून सुरू असलेल्या टीकेवर जरांगे पाटील अधिक आक्रमक झाले. त्यांनी थेट इशारा दिला की अन्यायाविरुद्ध आवाज उठवणे हा आमचा स्वभाव आहे. जर एखाद्या उमेदवाराला अशा प्रकारे जाणीवपूर्वक टार्गेट करून त्यांची बदनामी केली जात असेल, तर ती कोणत्याही परिस्थितीत सहन केली जाणार नाही. हे घाणेरडे प्रकार थांबवा, अन्यथा त्याचे गंभीर परिणाम भोगावे लागतील.
पक्षीय राजकारणापलीकडे ‘महिला सन्माना’ची भूमिका
नेहमी भाजप आणि सत्ताधारी नेत्यांवर तुटून पडणारे मनोज जरांगे पाटील यावेळी मात्र भाजप उमेदवाराच्या पाठीशी उभे राहिल्याचे पाहायला मिळाले. राजकीय मतभेद बाजूला ठेवून त्यांनी ‘महिला सन्मान’ आणि ‘सामाजिक भान’ जपण्याचा संदेश दिला आहे.
