Dhananjay Munde On Medical Officer Recruitment: राज्य सरकारने दिलेल्या मेगा भरतीच्या आश्वासनानुसार विविध विभागांमध्ये भरती प्रक्रिया सुरू झाली आहे. आता सार्वजनिक आरोग्य विभागाच्या ताज्या भरतीवरून नवा वाद उफाळला आहे. विभागाने कंत्राटी पद्धतीने तब्बल ३५०० पदांसाठी भरती जाहीर केली आहे, मात्र या जाहिरातींमध्ये एनटी (नवबौद्धिक तांत्रिक) प्रवर्गासाठी एकही जागा राखीव ठेवलेली नाही, ही बाब समोर आल्यानंतर विद्यार्थी आणि उमेदवारांमध्ये तीव्र नाराजी व्यक्त केली जात आहे. या पार्श्वभूमीवर राज्याचे माजी मंत्री आणि आमदार धनंजय मुंडे यांनी आरोग्यमंत्री प्रकाश आबिटकर यांना पत्र लिहून या दोन्ही जाहिराती तातडीने रद्द करून सुधारित जाहिरात प्रसिद्ध करण्याची मागणी केली आहे.
काय आहे नेमकं प्रकरण?
सार्वजनिक आरोग्य विभागाने ४ नोव्हेंबर २०२५ रोजी प्रसिद्ध केलेल्या दोन वेगवेगळ्या जाहिरातींनुसार राष्ट्रीय आरोग्य अभियानांतर्गत समुदाय आरोग्य अधिकारी (कंत्राटी) या पदांसाठी १९७४ जागा, आणि वैद्यकीय अधिकारी पदांसाठी (जाहिरात क्र. ०१/२०२५) १४४० जागा जाहीर करण्यात आल्या आहेत. मात्र, या दोन्ही जाहिरातींमध्ये एनटी अ, ब, क, ड – चारही उपप्रवर्गांसाठी एकही जागा आरक्षित नाही, हे स्पष्ट दिसून आले आहे. राज्यातील हजारो उमेदवार या भरतीसाठी पात्र असूनही त्यांना संधी नाकारल्याने असंतोष वाढला आहे.
धनंजय मुंडे यांनी म्हटलं आहे की, एनटी प्रवर्गातील अनेक उमेदवारांनी मला फोन आणि सोशल मीडियाच्या माध्यमातून तक्रारी पाठवल्या आहेत. जवळपास ३५०० पदांपैकी एकही पद एनटी प्रवर्गासाठी राखीव नसणे हा अन्याय आहे. मुंडे यांनी आपल्या पत्रात म्हटले आहे की, या दोन्ही जाहिरातींना तात्काळ स्थगिती देऊन, आरक्षणाचे पुनर्मूल्यांकन करून सुधारित जाहिरात काढावी, जेणेकरून कोणत्याही प्रवर्गावर अन्याय होणार नाही. मुंडे यांनी ही बाब ट्विटरवरूनही मांडली असून, त्यांनी स्पष्ट केलं आहे की, सरकारने आरक्षणाच्या नियमांचे पालन करून नव्याने भरती जाहीर करावी.
या प्रकरणावर आता राज्य सरकार काय भूमिका घेते, आणि एनटी प्रवर्गासाठी आरक्षणाची दुरुस्ती केली जाते का, हे पाहणे महत्त्वाचे ठरणार आहे. सध्या तरी आरोग्य विभागाची ही भरती वादाच्या भोवऱ्यात अडकली आहे.
