Pune Crime: पुण्यात एका विवाहितेच्या मृत्यूचे गूढ उकलण्यात पोलिसांना यश आले असून, हा अपघात नसून थंड डोक्याने केलेला खून असल्याचे तपासात निष्पन्न झाले आहे. ‘पत्नी गॅलरीतून पडली’ असा खोटा दावा करत रुग्णालयात पोहोचलेल्या पतीचा बनाव पोलिसांनी अवघ्या काही तासांत मोडीत काढला.
नेमकी घटना काय?
२४ मार्च रोजी सायंकाळच्या सुमारास बिबवेवाडी परिसरात ही घटना घडली. सारिका शुभम घोडके (२३) या विवाहितेची हत्या करण्यात आली. तिचा पती शुभम श्रीकांत घोडके (२९) याला पोलिसांनी अटक केली आहे. पत्नीच्या चारित्र्यावर संशय घेत शुभमने हे टोकाचे पाऊल उचलल्याचे समोर आले आहे.
संशयातून हिंसक कृत्य
पोलीस तपासातून मिळालेल्या माहितीनुसार, शुभम हा सारिकावर नेहमी संशय घ्यायचा, ज्यामुळे त्यांच्यात वारंवार भांडणे होत होती. घटनेच्या दिवशी वादाचे रूपांतर मोठ्या संघर्षात झाले. रागाच्या भरात शुभमने सारिकाला प्रचंड मारहाण केली आणि त्यानंतर धारदार शस्त्राने तिच्यावर वार करून तिची निर्घृण हत्या केली.
पोलिसांनी असा उघडला बनाव:
हत्या केल्यानंतर पुरावे नष्ट करण्यासाठी आणि गुन्ह्यातून वाचण्यासाठी शुभमने रचलेला कट उघड झाला. त्याने शेजाऱ्यांना आणि रुग्णालयात सांगितले की सारिका गॅलरीतून खाली कोसळली. सारिकाला रुग्णालयात नेले असता डॉक्टरांनी तिला मृत घोषित केले. मात्र, तिच्या अंगावरील जखमांचे स्वरूप आणि गॅलरीतून पडल्यामुळे होणाऱ्या जखमा यात मोठी तफावत होती. बिबवेवाडी पोलिसांनी घटनास्थळाची पाहणी केली असता त्यांना संशय आला. संशयावरून शुभमला ताब्यात घेऊन त्याची कडक चौकशी केली असता, त्याने हत्येची कबुली दिली.
आरोपीला बेड्या
बिबवेवाडी पोलिसांनी आरोपी पतीविरुद्ध भारतीय दंड संहितेनुसार खुनाचा गुन्हा दाखल केला आहे. आरोपीला न्यायालयात हजर करण्यात आले असून या घटनेमुळे परिसरात हळहळ आणि संताप व्यक्त होत आहे.
