Pimpri Chinchwad Lift Accident: पुणे जिल्ह्यातील पिंपरी चिंचवड शहरात गुरुवारी संध्याकाळी हृदयद्रावक दुर्घटना घडली. चौवीसवाडी परिसरातील राम स्मृती सोसायटीत राहणाऱ्या 12 वर्षांच्या मुलाचा लिफ्टमध्ये अडकून मृत्यू झाला आहे. मिळालेल्या माहितीनुसार, सोसायटीतील लिफ्ट तिसऱ्या आणि चौथ्या मजल्याच्या दरम्यान अचानक अडकली. त्यावेळी त्या लिफ्टमध्ये एक मुलगा अडकला असल्याची माहिती अग्निशमन दलाला देण्यात आली.
दरम्यान, तात्काळ घटनास्थळी धाव घेतलेल्या जवानांनी मुलाची सुटका करण्यासाठी शर्थीचे प्रयत्न केले. मात्र, मुलाचा खालचा भाग लिफ्टच्या दारात अडकला होता आणि त्यामुळे मोठ्या प्रमाणावर रक्तस्त्राव झाला. त्याला तातडीने जवळच्या खासगी रुग्णालयात नेण्यात आले, पण तोपर्यंत त्याचा मृत्यू झाला.
हेही वाचा – Pune Crime : आधी बायकोचा खून, नंतर नवऱ्यानं स्वत:ला संपवलं, दसऱ्याच्या पूर्वसंध्येला पुणे हादरलं
या घटनेने परिसरात हळहळ व्यक्त होत असून कुटुंबीयांवर दुःखाचा डोंगर कोसळला आहे. अपघातानंतर लिफ्टमध्ये नेमका काय तांत्रिक बिघाड झाला आणि मुलगा कशा परिस्थितीत अडकला, याचा तपास पोलिसांकडून सुरू आहे. या भीषण घटनेने पुन्हा एकदा लिफ्ट सुरक्षेचा प्रश्न गंभीरपणे पुढे आला आहे.
