Iran-US War: गेल्या 24 दिवसांपासून मध्य-पूर्वेमध्ये सुरू असलेल्या भीषण संघर्षाला अखेर तात्पुरता पूर्णविराम मिळण्याची शक्यता निर्माण झाली आहे. अमेरिकेचे राष्ट्राध्यक्ष डोनाल्ड ट्रम्प यांनी इराणवरील सर्व लष्करी हल्ले पुढील 5 दिवसांसाठी स्थगित करण्याचे आदेश दिले आहेत. या काळात दोन्ही देशांमध्ये राजनैतिक चर्चा होणार असून, भविष्यातील दिशा या वाटाघाटींवरून ठरवली जाणार आहे.
‘ट्रुथ सोशल’वरून ट्रम्प यांची मोठी घोषणा
डोनाल्ड ट्रम्प यांनी त्यांच्या ‘Truth Social’ या प्लॅटफॉर्मवर पोस्ट करत या निर्णयाची माहिती दिली. “मला जाहीर करताना आनंद होत आहे की, गेल्या 2 दिवसांत अमेरिका आणि इराणमध्ये अत्यंत विधायक चर्चा झाली आहे. शत्रुत्व संपवून सर्वसमावेशक तोडगा काढण्यासाठी आम्ही प्रयत्नशील आहोत. या सकारात्मक संकेतांमुळेच मी युद्ध विभागाला (Department of War) इराणची वीज केंद्रे आणि ऊर्जा पायाभूत सुविधांवरील हल्ले 5 दिवसांसाठी थांबवण्याचे निर्देश दिले आहेत,” असे ट्रम्प यांनी नमूद केले.
ऊर्जा संकट आणि जागतिक दबाव
28 फेब्रुवारी रोजी अमेरिका आणि इस्रायलने तेहरानवर केलेल्या मोठ्या हल्ल्यात इराणचे सर्वोच्च नेते अयातुल्ला सय्यद अली खामेनी यांच्यासह अनेक वरिष्ठ अधिकारी मारले गेले होते. त्यानंतर इराणने प्रत्युत्तरादाखल अमेरिकेचे लष्करी तळ आणि ऊर्जा प्रकल्पांना लक्ष्य केले. या 24 दिवसांच्या युद्धामुळे जगभरात तेल आणि वायूच्या किमती गगनाला भिडल्या असून, तीव्र ऊर्जा संकट निर्माण झाले आहे. याच जागतिक दबावामुळे अमेरिकेने चर्चेचा मार्ग स्वीकारल्याचे बोलले जात आहे.
पुढील आठवडा महत्त्वाचा
ट्रम्प यांच्या मते, इराणसोबतच्या या वाटाघाटी पुढील संपूर्ण आठवडाभर सुरू राहण्याची शक्यता आहे. मात्र, ही लष्करी स्थगिती केवळ पुढील 5 दिवसांसाठीच आहे. जर या बैठकांमध्ये अपेक्षित यश मिळाले, तरच ही स्थगिती पुढे वाढवली जाईल. अन्यथा, पुन्हा एकदा युद्धाचा भडका उडण्याची भीती तज्ज्ञांनी व्यक्त केली आहे.
इस्रायलची भूमिका काय?
अमेरिका आणि इराणमध्ये चर्चा सुरू असली, तरी या संघर्षातील तिसरा महत्त्वाचा पक्ष असलेल्या इस्रायलची भूमिका अद्याप स्पष्ट झालेली नाही. २८ फेब्रुवारीच्या घटनेनंतर इराणने इस्रायलवरही मोठे हल्ले केले होते. आता ट्रम्प यांच्या या निर्णयाला इस्रायलकडून कशा प्रकारे प्रतिसाद मिळतो, हे पाहणे औत्सुक्याचे ठरेल.
