Nashik News: नाशिकमधील पाथर्डी फाटा परिसरातील नरहरी नगरमध्ये एक अत्यंत चटका लावणारी घटना घडली आहे. इमारतीच्या चौथ्या मजल्यावरील बाल्कनीत खेळत असताना अचानक तोल गेल्याने सहा वर्षांच्या मुलाचा मृत्यू झाला. कीयांश प्रफुल्ल बेदाडे असे या दुर्दैवी बालकाचे नाव असून, या घटनेने संपूर्ण परिसरात शोककळा पसरली आहे.
नेमकी घटना काय?
मिळालेल्या माहितीनुसार, रविवारी सायंकाळच्या सुमारास कीयांश हा आपल्या राहत्या घरातील गॅलरीत खेळण्यात मग्न होता. खेळता खेळता अचानक त्याचा नियंत्रण सुटले आणि तो थेट चौथ्या मजल्यावरून खाली जमिनीवर कोसळला. हा अपघात इतका भीषण होता की, जमिनीवर आदळल्याने कीयांशला गंभीर दुखापत झाली. कुटुंबीयांनी त्याला तातडीने रुग्णालयात नेले, मात्र डॉक्टरांनी त्याला मृत घोषित केले.
एका क्षणात होत्याचे नव्हते झाले
कीयांश हा बेदाडे कुटुंबाचा एकुलता एक मुलगा होता. त्याचे वडील कामानिमित्त मनमाड येथे असतात, तर तो नाशिकमध्ये आई आणि दोन बहिणींसोबत राहत होता. घराचा लाडका आणि एकुलता एक मुलगा डोळ्यादेखत गेल्याने आईने केलेला आक्रोश काळजाचा थरकाप उडवणारा होता. घटनास्थळी जमलेल्या नागरिकांच्या डोळ्यांतही या घटनेने पाणी आले.
पोलीस तपास सुरू
या घटनेची माहिती मिळताच इंदिरानगर पोलिसांनी घटनास्थळी धाव घेतली. सध्या पोलीस ठाण्यात ‘आकस्मिक मृत्यू’ची नोंद करण्यात आली आहे. इमारतीच्या गॅलरीला सुरक्षा कठडे (Grills) होते का किंवा हा अपघात नेमका कसा घडला, याचा अधिक तपास पोलीस करत आहेत.
