Pune News: पुण्यातील राजकीय आणि सामाजिक वर्तुळात सध्या एका खळबळजनक प्रकरणाने मोठी खळबळ उडवून दिली आहे. राष्ट्रवादी काँग्रेसच्या आक्रमक नेत्या रुपाली पाटील ठोंबरे यांनी पत्रकार आणि काही राजकीय व्यक्तींवर अत्यंत गंभीर आरोप केले आहेत. आपल्याला बदनाम करण्यासाठी मोठे षड्यंत्र रचण्यात आले असून यामध्ये काही पत्रकारांचाही समावेश असल्याचा खळबळजनक दावा त्यांनी केला आहे. या संपूर्ण प्रकरणामुळे पुण्याच्या राजकीय आणि पत्रकारिता क्षेत्रात आता एकच चर्चा रंगली आहे.
बुधवार पेठेतील त्या लॉजमध्ये नक्की काय घडलं?
रुपाली पाटील ठोंबरे यांनी पत्रकार परिषदेत केलेल्या दाव्यानुसार, हा सर्व प्रकार पुण्यातील बुधवार पेठ परिसरातील एका लॉजमध्ये घडला. एका खासगी वृत्तवाहिनीच्या पत्रकाराने स्टिंग ऑपरेशनच्या नावाखाली तिथे एक रूम बुक केली होती.
या पत्रकाराने तिथे मद्यप्राशन केल्याचा आणि त्यानंतर शेजारच्या रूममध्ये थांबलेल्या एका कपलचे गुपचूप चित्रीकरण केल्याचा गंभीर आरोप रुपाली पाटील ठोंबरे यांनी केला आहे. विशेष म्हणजे, या संपूर्ण प्रकाराची कोणतीही कल्पना लॉज प्रशासनाला नव्हती, असेही त्यांनी स्पष्ट केले.
महिलेने केली मारहाण आणि स्टिंग ऑपरेशनचा बनाव
संबंधित पत्रकाराकडून चित्रीकरण होत असल्याचे लक्षात आल्यावर तिथल्या महिलेने त्या पत्रकाराला जाब विचारत शिवीगाळ केली आणि मारहाणही केल्याचा दावा करण्यात आला आहे. हा प्रकार साधारण 3 दिवसांपूर्वी घडला आहे.
या राड्यानंतर संबंधित पत्रकाराने थेट पोलीस उपायुक्तांना (डीसीपी) फोन करून आपण स्टिंग ऑपरेशनसाठी तिथे गेलो होतो, असा बनाव रचल्याचा आरोपही रुपाली ठोंबरे यांनी केला आहे. सध्या या प्रकरणी संबंधित पत्रकाराविरोधात गुन्हा दाखल करण्याची कायदेशीर प्रक्रिया सुरू आहे.
25 लाखांची सुपारी आणि बदनामीचा कट
या प्रकरणाला केवळ वैयक्तिक वादाची किनार नसून यात मोठ्या आर्थिक व्यवहाराचे धागेदोरे असल्याचा संशय रुपाली ठोंबरे यांनी व्यक्त केला आहे. पुण्यातील 2 ते 3 नामांकित पत्रकारांनी सुमारे 25 लाख रुपये घेऊन आपल्याला बदनाम करण्याची सुपारी घेतल्याचा खळबळजनक आरोप त्यांनी केला. पुण्याच्या वैभवशाली पत्रकारितेला या प्रकारामुळे तडा गेला असल्याची टीकाही त्यांनी यावेळी केली. राजकीय सूडभावनेतून आणि अशोक खरात प्रकरणानंतर आपल्याला लक्ष्य केले जात असल्याचा त्यांचा दावा आहे.
या वादात रुपाली पाटील ठोंबरे यांचे पती ॲड. विजय ठोंबरे यांनीही उडी घेतली आहे. त्यांनी सांगितले की, संबंधित पत्रकार हा त्यांच्या नातेवाईकांच्या लॉजमध्ये जाऊन चित्रीकरण करत होता आणि तिथूनच हा सर्व वाद सुरू झाला. माझ्या पत्नीचे राजकीय करिअर संपवण्यासाठी हे जाणीवपूर्वक रचलेले षड्यंत्र आहे. कोणत्याही महिलेची अशा प्रकारे बदनामी करणे चुकीचे असून, पोलीस यंत्रणेवर दबाव आणून दोषी पत्रकारांवर कारवाई टाळण्याचे प्रयत्न होत असल्याचा आरोपही त्यांनी केला आहे.
