Assembly Security Breach: महाराष्ट्र विधानसभेच्या अधिवेशनादरम्यान बनावट प्रवेश पास तयार केल्याचा एक अत्यंत गंभीर प्रकार उघडकीस आला आहे. या प्रकरणी मुंबईतील मरीन ड्राइव्ह पोलिसांनी तातडीने कारवाई करत 5 आरोपींना अटक केली आहे. धक्कादायक बाब म्हणजे, अटक करण्यात आलेल्यांमध्ये मंत्रालयात कार्यरत असलेल्या काही कर्मचाऱ्यांचाही समावेश असल्याचे समोर आले आहे. या खुलाशामुळे विधानसभेच्या उच्चस्तरीय सुरक्षा व्यवस्थेबाबत गंभीर प्रश्न निर्माण झाले असून, प्रशासकीय वर्तुळात मोठी खळबळ उडाली आहे.
मंत्र्यांची दखल आणि पोलिसांची कारवाई
सध्या सुरू असलेल्या अधिवेशनादरम्यान विधानसभा परिसरात प्रवेश करण्यासाठी बनावट पास तयार केले जात असल्याची तक्रार समोर आली होती. राज्याचे मंत्री उदय सामंत यांनी या प्रकरणाची गंभीर दखल घेत चौकशीचे आदेश दिले, त्यानंतर पोलिसांनी तपासाची चक्रे फिरवली. तपासादरम्यान पोलिसांनी केशव गुंजाल (53), गणपत भाऊ जवळे (50), नागेश शिवाजी पाटील (42), मनोज आनंद मोरबळे (40) आणि स्वप्नील रमेश तायडे (40) या पाच जणांना ताब्यात घेतले आहे. हे आरोपी विधानसभा संकुलात अनधिकृत प्रवेश मिळवून देण्यासाठी बनावट कागदपत्रे तयार करत होते.
रॅकेटचा सखोल तपास आणि पुढील पावले
पोलीस सूत्रांनी दिलेल्या माहितीनुसार, या संपूर्ण रॅकेटमध्ये (साखळीमध्ये) इतरही अनेक व्यक्तींचा सहभाग असण्याची दाट शक्यता आहे. मंत्रालयातील कर्मचाऱ्यांचा सहभाग असल्याने हे जाळे नेमके किती खोलवर पसरले आहे, याचा शोध घेण्यासाठी विशेष पथके नेमण्यात आली आहेत. सध्या इतर संशयितांचा शोध सुरू असून, या प्रकरणाचा तांत्रिक आणि कागदोपत्री पुरावा गोळा केला जात आहे. भविष्यात अशा घटना टाळण्यासाठी प्रवेश प्रक्रियेत बदल करण्याचे संकेतही देण्यात आले आहेत.
अर्थसंकल्पीय अधिवेशन
महाराष्ट्र विधानसभेच्या या अर्थसंकल्पीय अधिवेशनाची सुरुवात 23 फेब्रुवारी रोजी झाली आणि 25 मार्च रोजी त्याची सांगता झाली. या अधिवेशनात 6 मार्च रोजी मुख्यमंत्री देवेंद्र फडणवीस यांनी राज्याचा अर्थसंकल्प सादर केला. माजी उपमुख्यमंत्री अजित पवार यांच्या निधनानंतर, फडणवीस यांनी ही महत्त्वाची जबाबदारी स्वीकारली होती. या सत्रात ‘महाराष्ट्र धर्मस्वातंत्र्य विधेयक, 2026’ आणि ‘भारतीय न्याय संहिता (महाराष्ट्र सुधारणा) विधेयक, 2026’ यांसारखी दूरगामी परिणाम करणारी महत्त्वपूर्ण विधेयके मंजूर करण्यात आली आहेत.
