Ladki Bahin Yojana: महाराष्ट्र राज्यातील महिलांच्या सक्षमीकरणासाठी सुरू असलेल्या ‘मुख्यमंत्री माझी लाडकी बहीण’ योजनेच्या लाभार्थ्यांसाठी एक अत्यंत आनंदाची बातमी समोर आली आहे. फेब्रुवारी महिन्याचा सन्मान निधी वितरीत करण्याची तांत्रिक प्रक्रिया आजपासून अधिकृतपणे सुरू करण्यात आली आहे. महिला व बालविकास मंत्री आदिती तटकरे यांनी यासंदर्भात माहिती दिली असून, यामुळे राज्यातील लाखो पात्र महिलांना मोठा आर्थिक दिलासा मिळणार आहे.
पुढील २-३ दिवसांत बँक खात्यात पैसे जमा होणार
फेब्रुवारी महिन्याचा हप्ता वितरीत करण्याची प्रक्रिया तांत्रिक स्तरावर सुरू झाली असून, येत्या 2 ते 3 दिवसांत सर्व पात्र लाभार्थ्यांच्या बँक खात्यात हा निधी जमा होईल. विशेष म्हणजे, हा निधी थेट लाभार्थ्यांच्या आधार संलग्न (Aadhaar Seeded) बँक खात्यात जमा केला जाणार आहे. ज्या महिलांचे बँक खाते आधारशी लिंक आहे, त्यांना घरबसल्या या योजनेचा लाभ मिळणार असून, त्यांनी आपली बँक खाती तपासून घेण्याचे आवाहन प्रशासनाकडून करण्यात आले आहे.
मुख्यमंत्री माझी लाडकी बहीण योजना : फेब्रुवारी महिन्याच्या सन्मान निधी वितरणाची प्रक्रिया सुरू !
मुख्यमंत्री माझी लाडकी बहीण योजनेतील सर्व पात्र लाभार्थ्यांना फेब्रुवारी महिन्याचा सन्मान निधी वितरित करण्याची तांत्रिक प्रक्रिया आजपासून सुरू करण्यात आली आहे. पुढील २-३ दिवसांत सर्व…
— Aditi S Tatkare (@iAditiTatkare) March 27, 2026
महायुती सरकारचा दृढ निश्चय आणि दमदार वाटचाल
मुख्यमंत्री माझी लाडकी बहीण योजनेच्या यशस्वी अंमलबजावणीमागे महायुती सरकारचा दृढ निश्चय असल्याचे मंत्री आदिती तटकरे यांनी नमूद केले. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या सातत्यपूर्ण मार्गदर्शनाखाली ही योजना राबवली जात आहे. महाराष्ट्रातील लाडक्या बहिणींचा सरकारवर असलेला विश्वास आणि या योजनेची दमदार वाटचाल यापुढेही अशीच सुरू राहील, असा विश्वास त्यांनी यावेळी व्यक्त केला.
