Supriya Sule On Dhananjay Munde: राज्याच्या राजकारणात सध्या मोठ्या खळबळजनक घडामोडी घडत आहेत. नाशिकच्या जिल्हा व सत्र न्यायालयाने मंत्री माणिकराव कोकाटे यांना एका प्रकरणात दोषी ठरवत दोन वर्षांच्या कारावासाची शिक्षा सुनावली आहे. सर्वोच्च न्यायालयाच्या नियमानुसार, दोन वर्षांची शिक्षा झाल्यामुळे कोकाटे यांची आमदारकी रद्द झाली असून त्यांना मंत्रिपदावरूनही पायउतार व्हावे लागले आहे.
कोकाटे यांची आमदारकी रद्द होताच मुख्यमंत्री देवेंद्र फडणवीस यांनी तातडीने पावले उचलली आहेत. कोकाटे यांच्याकडील ‘क्रीडा व युवक कल्याण’ आणि ‘अल्पसंख्याक विकास व वक्फ’ ही खाती काढून ती उपमुख्यमंत्री अजित पवार यांच्याकडे सोपवण्याचे पत्र मुख्यमंत्र्यांनी राज्यपालांना दिले. मुख्यमंत्र्यांच्या पत्राची दखल घेत राज्यपालांनी बुधवारी रात्री या बदलांवर स्वाक्षरी केली.
सुप्रिया सुळे आक्रमक :
दरम्यान, कोकाटे यांच्या जाण्याने रिक्त झालेल्या मंत्रिपदावर आता माजी मंत्री धनंजय मुंडे यांची वर्णी लागण्याची शक्यता वर्तवली जात आहे. मात्र, या शक्यतेमुळे शरद पवार गट कमालीचा आक्रमक झाला असून खासदार सुप्रिया सुळे यांनी सरकारला थेट इशारा दिला आहे. “ज्या नेत्यावर गंभीर आरोप झाले आहेत, अशा धनंजय मुंडेंना गृहमंत्री अमित शाह भेट कशी काय देतात? याचे मला वाईट वाटते,” असे सुळे यांनी म्हटले.
आरोपांमध्ये तथ्य असल्याशिवाय सरकारने त्यांचा आधी राजीनामा घेतला होता का? असा सवाल त्यांनी उपस्थित केला. “जर धनंजय मुंडे यांना पुन्हा मंत्रिमंडळात स्थान दिले, तर आम्ही शांत बसणार नाही. आम्ही बीडमध्ये जाऊन उपोषण करू आणि राज्यभर तीव्र आंदोलन छेडू,” असा सज्जड दम सुळे यांनी सरकारला दिला आहे.
