Neelam Gorhe: राज्यात खळबळ उडवून देणाऱ्या ‘अशोक खरात’ प्रकरणाने आता राजकीय वळण घेतले असून, विधान परिषदेच्या उपसभापती डॉ. नीलम गोऱ्हे यांनी त्यांच्यावर झालेल्या आरोपांना पुण्यातून चोख प्रत्युत्तर दिले आहे. भोंदूगिरी आणि लैंगिक अत्याचाराच्या आरोपांनी वेढलेल्या अशोक खरात याच्याशी नाव जोडले गेल्याने संतापलेल्या डॉ. नीलम गोऱ्हे यांनी आज पुण्यात पत्रकार परिषद घेऊन आपली बाजू स्पष्ट केली. सामाजिक कार्यकर्त्या तृप्ती देसाई यांनी केलेले सर्व आरोप ‘कपोलकल्पित’ असल्याचे सांगत त्यांनी हे एक राजकीय षडयंत्र असल्याचे म्हटले आहे.
नेमका वाद काय?
अशोक खरात याच्यावर आतापर्यंत १० गुन्हे दाखल असून, त्यात ८ गुन्हे लैंगिक अत्याचाराचे तर २ आर्थिक फसवणुकीचे आहेत. या प्रकरणाच्या एसआयटी (SIT) चौकशीदरम्यान खरातचे काही राजकीय नेत्यांसोबतचे फोटो समोर आले होते. याच पार्श्वभूमीवर तृप्ती देसाई यांनी खळबळजनक दावा केला होता की, “डॉ. नीलम गोऱ्हे या मंत्रिपद आणि भविष्यासाठी गेल्या अनेक वर्षांपासून खरातच्या संपर्कात होत्या.”
नीलम गोऱ्हे यांचा खुलासा
पत्रकार परिषदेत बोलताना डॉ. गोऱ्हे यांनी सांगितलं की, मी अशोक खरातला आयुष्यात कधीही भेटलेली नाही. मंत्रिपदासाठी किंवा आमदारकीसाठी भोंदूबाबांचे भविष्य पाहण्याचे संस्कार माझ्यावर नाहीत.पुणे महानगरपालिकेत ज्यांना यश मिळाले नाही, असे काही ‘असंतुष्ट घटक’ माझ्याविरोधात हे नीच दर्जाचे कारस्थान रचत आहेत, असा थेट आरोप त्यांनी केला.निवडणुकीच्या पार्श्वभूमीवर किंवा राजकीय द्वेषातूनच माझी प्रतिमा मलीन करण्याचा हा प्रयत्न असल्याचे त्यांनी स्पष्ट केले.
खरातच्या पोलीस कोठडीत वाढ
दुसरीकडे, अशोक खरात याची पोलीस कोठडी २९ मार्च रोजी संपल्याने त्याला न्यायालयात हजर करण्यात आले होते. न्यायालयाने त्याची कोठडी १ एप्रिलपर्यंत वाढवली आहे. आज एसआयटीने खरातच्या कार्यालयाची झाडाझडती घेतली असून, तपासाचा फास अधिक आवळला जात आहे.
