Tukaram Mundhe: राज्यातील अत्यंत शिस्तप्रिय आणि वरिष्ठ सनदी अधिकारी (IAS) तुकाराम मुंढे यांच्या मातोश्री आसराबाई हरिभाऊ मुंढे यांचे वयाच्या 100 व्या वर्षी दुःखद निधन झाले. त्यांच्या निधनामुळे मुंढे कुटुंबीयांवर दुःखाचा डोंगर कोसळला असून, प्रशासकीय आणि सामाजिक वर्तुळातून मोठी हळहळ व्यक्त केली जात आहे.
पुण्यात अंत्यदर्शन, उद्या बीडमध्ये अंत्यसंस्कार
मिळालेल्या माहितीनुसार, आसराबाई मुंढे यांचे पार्थिव आज, 2 एप्रिल रोजी रात्री 9 वाजेपर्यंत पुण्यात अंत्यदर्शनासाठी ठेवण्यात येणार आहे. उद्या सकाळी (3 एप्रिल) बीड जिल्ह्यातील ‘ताडसोना’ या त्यांच्या मूळ गावी अंत्यसंस्कार पार पडणार आहेत.
पश्चिम बंगालमधून तुकाराम मुंढे रवाना
आईच्या निधनाची वार्ता समजली तेव्हा तुकाराम मुंढे पश्चिम बंगालमध्ये कार्यरत होते. ही बातमी मिळताच ते तातडीने विमानाने मुंबईकडे रवाना झाले आहेत. आज सायंकाळी मुंबईत पोहोचल्यानंतर ते थेट पुण्याला येतील आणि तेथून पार्थिवासह आपल्या मूळ गावी बीडकडे रवाना होतील.
शताब्दीपूर्तीनंतर निरोप
आसराबाई मुंढे यांनी वयाची शंभर वर्षे पूर्ण केली होती. आपल्या मुलाला (तुकाराम मुंढे) एक अत्यंत प्रामाणिक आणि धाडसी अधिकारी म्हणून घडवण्यात त्यांचा मोठा वाटा होता. त्यांच्या जाण्याने एका मोठ्या आधारस्तंभाचे छत्र हरपल्याची भावना व्यक्त होत आहे. अनेक मान्यवरांनी आणि प्रशासकीय अधिकाऱ्यांनी तुकाराम मुंढे यांचे सांत्वन केले आहे.
