बारामती: राज्यातील आरक्षणाच्या संघर्षामुळे बारामतीत पुन्हा तणावपूर्ण वातावरण निर्माण झाले आहे. गेल्या काही महिन्यांपासून महाराष्ट्रात आरक्षणाचा मुद्दा तापत आहे. मराठा आणि ओबीसी समुदायांमध्ये संघर्षाची चिन्हे दिसत आहेत. मराठा आरक्षणासाठी आंदोलक मनोज जरांगे पाटील सक्रिय असताना, ओबीसी नेते लक्ष्मण हाके यांनी पवार कुटुंबीयांवर टीका करत ओबीसी समुदाय एकत्र करण्याचे प्रयत्न सुरु केले आहेत. शरद पवारांच्या बारामतीत काही दिवसांपूर्वी हाकेंनी मोर्चा काढण्याचा प्रयत्न केला होता, ज्याला पोलिसांनी परवानगी नाकारली. तरीही, त्यांनी ओबीसी बांधवांसह मोर्चा काढून पवार कुटुंबीयांवर गंभीर आरोप केले. आता पुन्हा बारामतीत लक्ष्मण हाके यांनी घणाघाती टीका करत ‘झक मारली आणि पवार कुटुंबाला आम्ही निवडून दिलं,’ असा संताप व्यक्त केला आहे.
दरम्यान, 5 सप्टेंबरला आयोजित करण्यात आलेल्या ओबीसी एल्गार मोर्चाला परवानगी नाकारण्यात आली होती, तरी हा मोर्चा काढण्यात आला होता. त्यामुळे 14 जणांवर गुन्हा दाखल करण्यात आला होता. आज बारामती पोलीस ठाण्यात लक्ष्मण हाके आणि इतर 14 जण उपस्थित झाले. यावेळी त्यांनी स्वतःला अटक करण्याची मागणी केली. तथापी, पोलिसांनी त्यांना नोटीस देऊन सोडले. यामुळे बारामतीत मोठे राजकारण सुरु झाले आहे.
हेही वाचा – लक्ष्मण हाकेंच्या सहकाऱ्यावर बीडमध्ये हल्ला; माजलगाव ग्रामीण पोलीस ठाण्यात गुन्हा दाखल
अजित पवारांवर आरोप
लक्ष्मण हाके यांनी पवार कुटुंबावर आरोप करत म्हटले की, पवार कुटुंब आमच्या मागच्या 4 पिढ्यांना संपवले आणि पुढच्या 4 पिढ्यांसाठी महाज्योतीला निधी किंवा वसतिगृह बांधू दिले नाही. एखादा तरुण बोलला की त्याच्यावर अजित पवार गुन्हे दाखल करतात. आम्ही पवारांना झक मारायला निवडून दिलं. तथापी, त्यांनी खासदार सुप्रिया सुळे यांच्यावरही टीका केली आणि म्हटलं की, ‘आर्थिक निकषावरच आरक्षण द्यायला हवे, पण सुप्रिया सुळे उत्कृष्ट नसून निकृष्ट संसदपटू आहेत.’
