Yavatmal District: महाराष्ट्र सरकारने नुकतेच ११ नवीन अपर जिल्हाधिकारी कार्यालये आणि तब्बल 69 अपर तहसील कार्यालये मंजूर केली आहेत. प्रशासकीय कामकाज सुलभ करणे आणि ग्रामीण भागातील नागरिकांना जिल्हास्तरावरील, तालुकास्तरावरील कामे जवळ उपलब्ध करून देणे, हा यामागील उद्देश होता.
यातीलच एक अपर जिल्हाधिकारी कार्यालय यवतमाळ जिल्ह्यातील पुसद येथे आणि जिल्ह्यातील पुसदमधील शेंबाळपिंपरी आणि उमरखेडमधील ढाणकी येथे अपर तहसील कार्यालय मंजूर झाले आहे. यामुळे जिल्ह्याच्या महसूल विभागाची नव्याने पुनर्रचना होणार आहे. या पुनर्रचनेचा प्रस्ताव महसूल विभागाने शासनाकडे सादर केला आहे.
यवतमाळ मोठा जिल्हा :
यवतमाळ जिल्ह्यात आजघडीला तब्बल 16 तालुक्यांचा समावेश होतो. जिल्ह्याचे भौगोलिक क्षेत्र बरेच मोठे आहे. जिल्हा मुख्यालयापासून अनेक गावांचे अंतर 100 किलोमीटरपेक्षा अधिक आहे. लोकसंख्याही 27 लाखांच्या घरात आहे. हीच भौगोलिक क्षेत्रफळ आणि येणाऱ्या अडचणी लक्षात घेऊन शासनाने पुसद येथे अपर जिल्हाधिकारी कार्यालय मंजूर केले आहे.
नवीन रचना कशी असेल?
या अंतर्गत पुसद आणि उमरखेड हे दोन उपविभाग, पुसद, दिग्रस, उमरखेड आणि महागाव हे चार तालुके, हीच चार तहसील कार्यालये आणि शेंबाळपिंपरी व ढाणकी या नव्याने होणाऱ्या अपर तहसील कार्यालयांचा समावेश होणार आहे. एकूण 8 लाख लोकसंख्या पुसद अपर जिल्हाधिकारी कार्यालयाला जोडली जाणार आहे
दोन अपर तहसील कार्यालयांना मंजुरी :
पुसद आणि उमरखेड तहसील कार्यालयाचे विभाजन करून पुसदमधील शेंबाळपिंपरी आणि उमरखेडमधील ढाणकी या दुर्गम म्हणून गणल्या जाणाऱ्या मंडळासाठी अपर तहसील कार्यालय मंजूर झाली आहेत. त्यामुळे चार तहसील कार्यालय आणि दोन अपर तहसील कार्यालय यांचा समावेश पुसद अपर जिल्हाधिकारी कार्यालयाअंतर्गत येणार आहेत.
