Jalna Tragedy: जालना जिल्ह्यात आज सकाळी एक हृदयद्रावक घटना घडली. केवळ १३ वर्षांच्या विद्यार्थिनीने शाळेच्या इमारतीच्या गच्चीवरून उडी मारून आत्महत्येचा प्रयत्न केल्याने तिचा दुर्दैवी मृत्यू झाला. या घटनेमुळे शाळा परिसरात एकच खळबळ उडाली असून पालक व स्थानिकांमध्ये चिंता व्यक्त केली जात आहे.
सकाळच्या सत्रात धक्कादायक घटना
आज सकाळी ७:३० ते ८:०० च्या दरम्यान इयत्ता ७ वीमध्ये शिकणारी विद्यार्थिनी अचानक शाळेच्या इमारतीच्या वरच्या मजल्यावर चढली आणि तिने तेथून उडी मारली. ही घटना पाहताच कर्मचारी आणि विद्यार्थ्यांनी तत्काळ अधिकाऱ्यांना संपर्क साधला. जखमी अवस्थेत तिला प्रथम जवळच्या खाजगी रुग्णालयात नेण्यात आले आणि नंतर जालना सिव्हिल हॉस्पिटलला हलवण्यात आले. मात्र डॉक्टरांनी तिला मृत घोषित केले.
हेही वाचा –माझे अवयव दान करा…; दिल्लीत सांगलीच्या विद्यार्थ्याची शिक्षकांच्या जाचाला कंटाळून आत्महत्या
पोलिसांचा सविस्तर तपास सुरू
सदर पोलीस स्टेशनला सकाळी ८ वाजताच्या सुमारास फोन आला. एक पथक घटनास्थळी पोहोचले आणि त्यांनी प्राथमिक चौकशी सुरू केली. अधिकाऱ्यांनी सांगितलं की, विविध बाजूंनी तपास सुरू आहे. सध्या कोणताही निष्कर्ष काढणे चूकीचे आहे. शिक्षक, शाळेतील अधिकारी, विद्यार्थी आणि कुटुंबातील सदस्यांचे जबाब नोंदवण्यात आले आहेत. तसेच शाळेच्या परिसरातील सीसीटीव्ही फुटेजची देखील तपासणी सुरू आहे. आतापर्यंत कोणतीही सुसाईड नोट सापडलेली नाही. पोलिसांनी अपघाती मृत्यू अहवाल (एडीआर) दाखल केला असून पुढील तपास सुरू आहे. मृत्यूचे नेमके कारण निश्चित करण्यासाठी मुलीचा मृतदेह शवविच्छेदन तपासणीसाठी पाठवण्यात आला आहे. अधिकाऱ्यांनी पारदर्शक आणि सखोल चौकशीचे आश्वासन दिले आहे.
