Sureshkumar Jethaliya : जालना जिल्ह्यातील परतूर मतदारसंघाचे माजी आमदार सुरेशकुमार जेथलिया यांचे हृदयविकाराच्या तीव्र झटक्याने निधन झाले. पहाटेच्या सुमारास झोपेतच त्यांना हृदयविकाराचा झटका आला. त्यानंतर त्यांना तातडीने जालना येथील खाजगी रुग्णालयात दाखल करण्यात आले, मात्र डॉक्टरांनी त्यांना मृत घोषित केले. ते 64 वर्षांचे होते.
सुरेशकुमार जेथलिया हे दिवंगत उपमुख्यमंत्री अजित पवार यांचे विश्वासू म्हणून ओळखले जात होते. त्यांच्या निधनामुळे राष्ट्रवादी काँग्रेसमध्ये तसेच जालना जिल्ह्याच्या राजकारणात मोठी पोकळी निर्माण झाली आहे.
राजकीय कारकिर्दीत त्यांनी विविध पक्षांत काम करत आपला ठसा उमटवला. 2004 मध्ये शिवसेनेकडून त्यांची विधानपरिषदेवर निवड झाली होती. 2009 मध्ये त्यांनी परतूर विधानसभा मतदारसंघातून अपक्ष म्हणून निवडणूक लढवून विजय मिळवला आणि आमदार म्हणून प्रतिनिधित्व केले. त्यानंतर त्यांनी काँग्रेसमध्ये प्रवेश केला.
2024 च्या विधानसभा निवडणुकीत त्यांनी पुन्हा बंडखोरी करत अपक्ष म्हणून निवडणूक लढवली, मात्र त्यात त्यांचा पराभव झाला. या बंडखोरीनंतर काँग्रेस पक्षाने त्यांना सहा वर्षांसाठी निष्कासित केले होते.
यानंतर फेब्रुवारी 2025 मध्ये अजित पवार यांच्या उपस्थितीत त्यांनी राष्ट्रवादी काँग्रेसमध्ये प्रवेश केला. पक्षाने त्यांच्यावर महत्त्वाच्या जबाबदाऱ्या सोपवल्या होत्या.
स्थानिक पातळीवरही त्यांचा मोठा प्रभाव होता. तब्बल 25 वर्षे परतूर नगरपालिका त्यांच्या प्रभावाखाली राहिली. त्यांच्या निधनामुळे परतूर-मंठा परिसरात शोककळा पसरली असून राजकीय वर्तुळातून हळहळ व्यक्त केली जात आहे.
