Maharashtra AI Hub: महाराष्ट्रात तंत्रज्ञान क्षेत्रातील मोठी गुंतवणूक खेचण्यासाठी आज मुख्यमंत्री देवेंद्र फडणवीस आणि मायक्रोसॉफ्टचे मुख्य कार्यकारी अधिकारी सत्या नडेला यांची मुंबईत महत्त्वपूर्ण बैठक झाली. मायक्रोसॉफ्टच्या या भेटीसाठी फडणवीस यांनी हिवाळी अधिवेशनातून तातडीने मुंबई गाठली. बैठकीनंतर माध्यमांशी बोलताना फडणवीस यांनी सांगितले की, मायक्रोसॉफ्ट महाराष्ट्रात मोठ्या प्रमाणात गुंतवणुकीचा विचार करत असून GCC – Global Capability Center उभारण्यासाठी राज्य सरकार आणि कंपनी यांच्यात प्राथमिक चर्चा झाली आहे. सुमारे 20 लाख चौरस फूट जागेत हा भव्य GCC प्रकल्प उभारला जाणार असल्याचे त्यांनी स्पष्ट केले.
हेही वाचा – महाराष्ट्रात हुडहुडी..! परभणीचा पारा ५.५ अंशांवर, १४हुन अधिक जिल्ह्यांना यलो अलर्ट; आजचे हवामान काय?
45 हजार नवीन रोजगारांची निर्मिती
या प्रकल्पामुळे सुमारे 45,000 रोजगार निर्माण होणार आहेत, असे फडणवीस यांनी सांगितले. यासाठी राज्य सरकार आणि मायक्रोसॉफ्ट यांच्यात लवकरच सामंजस्य करार (MoU) करण्यात येणार आहे. महाराष्ट्राला AI हब बनवण्याबाबत मायक्रोसॉफ्टने सकारात्मक भूमिका दाखवली असल्याचे फडणवीस यांनी नमूद केले. बैठकीदरम्यान कंपनीच्या Prime AI OS चे सादरीकरण करण्यात आले. तसेच आरोग्य, शिक्षण, शेती यांसारख्या विविध क्षेत्रांत AIचा कसा प्रभावी वापर करता येईल, यावरही चर्चा झाली.
🔸 CM Devendra Fadnavis at the ‘Microsoft AI Tour, Mumbai’ programme, where a keynote was presented by Satya Nadella, Chairman and CEO Microsoft.
🔸 मुख्यमंत्री देवेंद्र फडणवीस यांची ‘मायक्रोसॉफ्ट एआय टूर, मुंबई’ या कार्यक्रमात प्रमुख उपस्थिती, जेथे मायक्रोसॉफ्टचे मुख्य… pic.twitter.com/o8K1whAV9b
— CMO Maharashtra (@CMOMaharashtra) December 12, 2025
मायक्रोसॉफ्टची भारतात 17.5 अब्ज डॉलरची गुंतवणूक
सत्या नडेला यांनी भारतातील गुंतवणुकीबाबत मोठी घोषणा केली. मायक्रोसॉफ्ट 17.5 अब्ज डॉलर (सुमारे 1.57 लाख कोटी रुपये) भारतात गुंतवणार आहे. ही कंपनीची आशियातील आतापर्यंतची सर्वात मोठी गुंतवणूक ठरणार आहे. नडेला म्हणाले, भारताच्या AI-युक्त भविष्यासाठी मजबूत पायाभूत सुविधा उभारणे, लाखो लोकांना नवीन कौशल्ये देणे आणि डेटा सुरक्षेला बळकटी देणे हे आमचे उद्दिष्ट आहे. भारताच्या भविष्यासाठी ही गुंतवणूक अत्यंत निर्णायक ठरेल. या बैठकीमुळे महाराष्ट्रात मोठी तंत्रज्ञानक्रांती घडण्याची चिन्हे दिसत आहेत.
