Thane Crime News : ठाणे शहरात एक धक्कादायक आणि संतापजनक घटना समोर आली आहे. अवघ्या सात वर्षांच्या चिमुरडीवर बांधकाम साईटवर अत्याचार झाल्याने परिसरात संतापाची लाट उसळली आहे.
मिळालेल्या माहितीनुसार, पीडित मुलीचे वडील त्या साईटवर काम करत असून आई गावी गेल्यामुळे मुलगी वडील आणि धाकट्या बहिणीसह राहत होती. काल रात्री मुलगी एकटी असल्याची संधी साधत आरोपीने तिच्यावर अत्याचार केला आणि घटनास्थळावरून पळ काढला.
धक्कादायक बाब म्हणजे आरोपी काही दिवसांपूर्वीच त्या साईटवर कामासाठी आला होता, तर त्याचा भाऊ आधीपासून तेथे कार्यरत असल्याची माहिती समोर आली आहे.
घटनेची माहिती मिळताच नौपाडा पोलिसांनी तत्काळ हालचाल करत दोन ते तीन पथके तयार केली. काही तासांतच आरोपीला अटक करण्यात पोलिसांना यश आले. आरोपी बिहारमधील असल्याची प्राथमिक माहिती आहे.
या घटनेमुळे ठाणे परिसरात तीव्र संताप व्यक्त होत असून आरोपीवर कठोर कारवाई करण्याची मागणी नागरिकांकडून केली जात आहे. पोलिसांकडून पुढील तपास सुरू असून पीडित मुलीवर रुग्णालयात उपचार सुरू आहेत.
