Mumbai Ranichi Baug: मुंबईतील भायखळा येथील वीरमाता जिजाबाई भोसले उद्यान आणि प्राणीसंग्रहालयातून आणखी एक धक्कादायक घटना समोर आली आहे. ‘शक्ती’ नावाचा नर वाघ संशयास्पद परिस्थितीत मृतावस्थेत आढळला असून, या घटनेने प्राणीसंग्रहालयाच्या व्यवस्थापनावर गंभीर प्रश्न निर्माण केले आहेत. 2020 मध्ये छत्रपती संभाजीनगर येथून मुंबईत आणलेल्या या वाघाचे वय मृत्यूच्या वेळी अंदाजे 10 वर्षे होते.
मृत्यूचे कारण काय?
प्राथमिक माहितीनुसार, वाघाला अचानक झटके आल्याने किंवा मांस खाताना श्वसननलिकेत हाड अडकल्याने त्याचा मृत्यू झाला असावा, असा अंदाज व्यक्त केला जात आहे. मात्र त्या क्षणी योग्य उपचार का मिळाले नाहीत? हा मोठा प्रश्न उपस्थित होत आहे. त्याहूनही गंभीर बाब म्हणजे वाघाचा मृत्यू झाल्यानंतर आठ दिवस ही घटना प्राणीसंग्रहालयाने गोपनीय ठेवली, ज्यामुळे संशय अधिकच वाढला आहे.
हेही वाचा –बिबट्या पुण्याच्या वेशीवर; पहाटे औंधमध्ये बिबट्या दिसल्याने शहरात खळबळ
व्यवस्थापनावर गंभीर आरोप
व्याघ्रप्रेमी प्रथमेश जगताप यांनी प्रशासनावर थेट हलगर्जीपणाचे आरोप केले आहेत. त्यांच्या म्हणण्यानुसार वाघाच्या मृत्यूची माहिती त्वरित देण्याऐवजी ती लपवण्यात आली. तसेच पीडित वाघाला आवश्यक ती वैद्यकीय सेवा वेळेवर मिळाली नाही. तथापी, मृतदेहाचे शवविच्छेदन अहवाल येण्याआधीच त्याची विल्हेवाट लावण्यात आली. तसेच महाराष्ट्र झू अथॉरिटी आणि सेंट्रल झू अथॉरिटीला केवळ ई-मेलद्वारे याबाबत माहिती देण्यात आल्याचा आरोपही त्यांनी केला आहे. जगताप यांनी या प्रकरणाची सखोल चौकशी व संबंधित अधिकाऱ्यांवर फौजदारी गुन्हे दाखल करण्याची मागणी केली आहे.
प्राणीसंग्रहालयाची भूमिका विवादात
उद्यान प्रशासनाचे म्हणणे आहे की, मुंबई महानगरपालिकेच्या आयुक्तांची परवानगी न मिळाल्याने त्यांनी मृत्यूची माहिती सार्वजनिक केली नाही. पण आयुक्तांनी परवानगी का दिली नाही? हा प्रश्न अद्यापही अनुत्तरित आहे.
