Maharashtra Politics : महाराष्ट्राच्या राजकारणात पुन्हा एकदा मोठ्या घडामोडी घडण्याची चिन्हे दिसत आहेत. शिवसेना (उद्धव बाळासाहेब ठाकरे) पक्षातील काही खासदार मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याची चर्चा राजकीय वर्तुळात रंगली आहे. सूत्रांच्या माहितीनुसार, तब्बल सहा खासदार शिंदे गटाच्या संपर्कात असून दिल्लीतील हालचालींना वेग आला आहे.
या पार्श्वभूमीवर संबंधित खासदारांनी लोकसभा अध्यक्षांची भेट घेण्यासाठी वेळ मागितल्याची माहिती समोर आली आहे. दरम्यान, मुख्यमंत्री एकनाथ शिंदे यांनीही तातडीने दिल्ली गाठून लोकसभा अध्यक्ष ओम बिर्ला यांची भेट घेतल्याने या चर्चांना आणखी बळ मिळाले आहे.
सूत्रांच्या माहितीनुसार, काही खासदार स्वतंत्र गट स्थापन करून नंतर शिंदे यांच्या शिवसेनेत विलीन होण्याची रणनीती आखत असल्याची चर्चा आहे. या संपूर्ण राजकीय हालचालींना ‘ऑपरेशन टायगर’ असे नाव दिले जात असल्याचे बोलले जात आहे.
या चर्चेत यवतमाळ-वाशीमचे संजय देशमुख, परभणीचे संजय जाधव, शिर्डीचे भाऊसाहेब वाकचौरे, मुंबई ईशान्यचे संजय दिना पाटील आणि हिंगोलीचे नागेश पाटील आष्टीकर यांची नावे पुढे येत आहेत. तर धाराशिवचे खासदार ओमराजे निंबाळकर हे संपर्काबाहेर असल्याच्या चर्चाही रंगल्या आहेत.
दरम्यान, ठाकरे गटाचे नेते संजय राऊत, अनिल देसाई आणि अरविंद सावंत हे दिल्लीत संयुक्त पत्रकार परिषद घेणार असल्याची माहिती समोर आली आहे. त्यामुळे या सर्व चर्चांवर अधिकृत भूमिका स्पष्ट होण्याची शक्यता आहे.
सूत्रांच्या माहितीनुसार, १९ जून रोजी मुंबईतील गोरेगाव येथील नेस्को सेंटरमध्ये शिंदे गटाच्या वर्धापन दिन कार्यक्रमादरम्यान या राजकीय घडामोडींना अंतिम स्वरूप मिळू शकते. मात्र, संबंधित खासदारांकडून अद्याप कोणतीही अधिकृत घोषणा करण्यात आलेली नसल्याने पुढील घडामोडींवर सर्वांचे लक्ष लागले आहे.
