Ajit Pawar : महायुती सरकारची ‘मुख्यमंत्री माझी लाडकी बहीण योजना’ ही महिलांसाठी अत्यंत लोकप्रिय ठरलेली योजना आहे. या योजनेअंतर्गत 21 ते 65 वयोगटातील पात्र महिलांना दरमहा 1500 रुपये दिले जातात, ज्यामुळे 2024 च्या विधानसभा निवडणुकीत महायुतीला मोठा विजय मिळाल्याचे मानले जाते.
आता आगामी महापालिका निवडणुकीच्या पार्श्वभूमीवर ‘लाडकी सुनबाई योजना’ सुरू करण्याच्या चर्चांना उधाण आले आहे. अशी माहिती आहे की, उपमुख्यमंत्री एकनाथ शिंदे रविवारी ठाण्यात याबाबत घोषणा करणार आहेत. मात्र, यावर उपमुख्यमंत्री अजित पवार यांनी स्पष्ट आणि ठाम प्रतिक्रिया दिली आहे.
अजित पवार यांनी माध्यमांना उद्देशून सांगितले की, “सूत्रांच्या माध्यमातून बातम्या पसरवणे थांबवा. आम्ही जे काही ठरवतो, ते स्पष्टपणे सांगतो. कोणताही निर्णय घ्यायचा असेल, तर तो कॅबिनेटमध्ये घेतला जाईल आणि पत्रकारांमार्फत संपूर्ण महाराष्ट्राला कळवला जाईल. सध्या तरी असा कोणताही निर्णय झालेला नाही.” त्यांनी पुढे नमूद केले की, सरकार नेहमीच जनहिताचे आणि सकारात्मक निर्णय घेण्यासाठी कटिबद्ध आहे, परंतु सध्याच्या घडीला ‘लाडकी सुनबाई योजना’बाबत कोणताही ठोस निर्णय झालेला नाही.
नाशिकच्या पालकमंत्रीपदाचा वाद कायम
दरम्यान, महायुतीत नाशिकच्या पालकमंत्रीपदाचा वाद कायम आहे. भाजप नेते गिरीश महाजन यांनी धुळ्यातील एका कार्यक्रमात “नाशिकचा पालकमंत्री मीच होणार,” असा दावा केला आहे. दुसरीकडे, राष्ट्रवादी (अजित पवार गट) नेते छगन भुजबळ यांनी नाशिकमध्ये सात आमदार एकाच पक्षाचे असल्यास त्या पक्षाला पालकमंत्रीपद मिळायला हवे, अशी आग्रही भूमिका मांडली आहे.
यावर अजित पवार यांनी सावध प्रतिक्रिया देताना म्हटले, “महाराष्ट्राच्या निर्मितीपासूनच मुख्यमंत्र्यांना मंत्रिपद, राज्यमंत्रिपद आणि पालकमंत्रीपदाचा निर्णय घेण्याचा पूर्ण अधिकार आहे. मुख्यमंत्री एकनाथ शिंदे सक्षम असून, ते याबाबत योग्य निर्णय घेतील.”
अजित पवार पुढे बोलताना म्हणाले की, काही ठिकाणी पालकमंत्री नसले तरी विकासकामे सुरू आहेत. “जिल्हा नियोजन बैठका होत आहेत, निधी वितरित होत आहे, आणि विकासकामांवर कोणताही परिणाम झालेला नाही. प्रत्येकाला आपले मत मांडण्याचा अधिकार आहे, आणि मी माझ्या पक्षाचा प्रमुख म्हणून माझे मत स्पष्ट केले आहे, असं अजित पवार म्हणाले.
