Nashik Municipal Election: महानगरपालिका निवडणुकीचा जाहीर प्रचार संपायला अवघे काही तास उरले असतानाच, नाशिक भाजपमध्ये मोठी खळबळ उडाली आहे. पक्षशिस्त मोडीत काढून अधिकृत उमेदवारांविरोधात दंड थोपटणाऱ्या तब्बल ५४ बंडखोर नेत्यांची भाजपने पक्षातून हकालपट्टी केली आहे. यामध्ये माजी महापौरांसह २० माजी नगरसेवकांचा समावेश असून, ही नाशिकच्या राजकीय इतिहासातील आतापर्यंतची सर्वात मोठी कारवाई मानली जात आहे.
बंडखोरांना घरचा रस्ता
महापालिका निवडणुकीत उमेदवारी न मिळाल्याने संतापलेल्या अनेक दिग्गजांनी भाजपच्या अधिकृत उमेदवारांसमोर आव्हान उभे केले होते. काही नेत्यांनी अपक्ष तर काहींनी प्रतिस्पर्धी पक्षांकडून उमेदवारी अर्ज दाखल केले होते. या बंडखोरीमुळे पक्षाच्या अधिकृत उमेदवारांना फटका बसण्याची शक्यता लक्षात घेऊन प्रदेश नेतृत्वाच्या आदेशानुसार ही कडक कारवाई करण्यात आली आहे.
यादीत ‘या’ बड्या नावांचा समावेश
या हकालपट्टीच्या यादीत नाशिकमधील अनेक प्रस्थापित नावांचा समावेश असल्याने राजकीय वर्तुळात चर्चांना उधाण आले आहे. यात माजी महापौर अशोक मुर्तडक, माजी सभागृह नेते व गटनेते शशिकांत जाधव, सतीश सोनवणे, कमलेश बोडके, दिलीप दातीर आणि अनिल मटाले यांचा समावेश आहे. तसेच माजी नगरसेवक व पदाधिकारी पुनम सोनवणे, मिरा हांडगे, सुनीता पिंगळे, अंबादास पगारे, अलका अहिरे, रुची कुंभारकर, मुकेश शहाणे, पंडीत आवारे यांच्यासह एकूण ५४ जणांना बाहेरचा रस्ता दाखवण्यात आला आहे.
प्रचाराच्या तोफा थंडावण्यापूर्वी मोठा धक्का
आज सायंकाळी ५:३० वाजता प्रचाराची मुदत संपणार आहे. त्यापूर्वीच ही कारवाई करून भाजपने बंडखोरांना पाठिंबा देणाऱ्या कार्यकर्त्यांना कडक इशारा दिला आहे. पक्षापेक्षा कुणीही मोठे नाही, हा संदेश या कारवाईतून देण्याचा प्रयत्न भाजपने केला आहे. आता या हकालपट्टीचा परिणाम प्रत्यक्ष मतदानावर आणि भाजपच्या जागांच्या गणितावर कसा होतो, याकडे सर्वांचे लक्ष लागले आहे.
