ZP Election : नाशिकमध्ये जिल्हा परिषद निवडणुकीच्या पार्श्वभूमीवर भाजपला मोठा राजकीय धक्का बसला आहे. नाशिक भाजप शहराध्यक्ष सुनील केदार यांनी अचानक आपल्या पदाचा राजीनामा दिला आहे. ऐन निवडणुकीच्या तोंडावर झालेल्या या घडामोडीमुळे भाजपच्या गोटात खळबळ उडाली आहे.
महापौर-उपमहापौर नावांवरून नाराजी
महापौर आणि उपमहापौर पदासाठी प्रदेश पातळीवरून आलेली नावे अचानक बदलण्यात आल्याने सुनील केदार नाराज होते, अशी माहिती सूत्रांकडून मिळाली आहे. महापौरपदासाठी हिमगौरी आडके, तर उपमहापौरपदासाठी मच्छिंद्र सानप यांच्या नावावर शिक्कामोर्तब झाल्यानंतर भाजपमधील अंतर्गत नाराजी उघडपणे समोर आली.
पक्षातील मतभेद चव्हाट्यावर
काही दिवसांपूर्वी सुनील केदार यांनी शिवसेनेला सत्तेत सहभागी करून घेण्याचा प्रस्ताव दिला होता. मात्र, त्यानंतर मंत्री गिरीश महाजन यांनी ‘आम्हाला सत्तेसाठी कुणाची गरज नाही’ असे स्पष्ट वक्तव्य केले होते. या वक्तव्यामुळे पक्षातील मतभेद अधिक तीव्र झाल्याची चर्चा आहे.
प्रदेश समितीकडे राजीनामा
या सर्व घडामोडींनंतर सुनील केदार यांनी प्रदेश भाजप समितीकडे आपल्या पदाचा राजीनामा पाठवला आहे. मात्र, नवीन व्यवस्था होईपर्यंत कामकाज पाहणार असल्याचेही त्यांनी स्पष्ट केले आहे.
ऐन जिल्हा परिषद निवडणुकीदरम्यान भाजपच्या शहराध्यक्षांनी राजीनामा दिल्यामुळे नाशिकमधील भाजपची रणनीती अडचणीत येण्याची शक्यता व्यक्त केली जात आहे.
