Samruddhi Highway Accident : समृद्धी महामार्गावर गुरुवारी सकाळी दहाच्या सुमारास भयानक अपघात घडला. या अपघातात दोन जणांचा जागीच मृत्यू झाला. कारचे टायर पंक्चर झाल्याने बाजूला उभी केलेली गाडी आणि त्यांच्या मदतीसाठी धावलेला शेतकरी या आयशर ट्रकच्या जोरदार धडकेमुळे या भयावह घटनेचे शिकार झाले.
ही घटना नाशिक जिल्ह्यातील निफाड तालुक्यातील जयपूर शिवारात महामार्ग क्रमांक ४०२ वर घडली. अपघातात कारचालक आणि निरपराध शेतकऱ्याचा मृत्यू झाल्याने परिसरात हळहळ व्यक्त केली जात असून, सोबत असलेल्या एका व्यक्तीला गंभीर दुखापत झाली आहे.
कोळेगाव (ता. निफाड, जि. नाशिक) येथील कारचालक योगेश दत्तात्रय घाटेकर (वय ३८) हे बाळू विश्वनाथ घाटेकर (वय ६०, रा. राकेळगाव, ता. निफाड) यांच्यासोबत रेशीम विक्रीसाठी जालना येथे निघाले होते. समृद्धी महामार्गावर जयपूर शिवारात कारचे टायर पंक्चर झाल्याने त्यांनी गाडी महामार्गाच्या बाजूला उभी केली आणि दुरुस्ती सुरू केली.
याचवेळी शेतात काम करीत असलेले स्थानिक शेतकरी देविदास नाना मते (वय ६०, रा. जयपूर, ता. छत्रपती संभाजीनगर) हे मदतीसाठी धावले. तिघेही कारच्या बाजूला उभे असताना छत्रपती संभाजीनगरकडून वेगाने येणाऱ्या आयशर ट्रकने त्यांना जोरदार धडक दिली.
या धक्क्यात कारचालक योगेश घाटेकर आणि शेतकरी देविदास मते हे दोघेही जागीच ठार झाले, तर बाळू घाटेकर यांना गंभीर दुखापत झाली. जखमींना तात्काळ स्थानिक रुग्णालयात दाखल करण्यात आले असले तरी त्यांची प्रकृती चिंताजनक आहे.
योगेश घाटेकर हे निफाडहून जालना मार्गे रेशीम विक्रीसाठी निघाले असताना हा अपघात झाला. पंक्चर झालेल्या कारची दुरुस्ती करताना शेतकरी देविदास मते यांची निस्वार्थ मदत घेऊन ते सुरक्षितपणे पुढे जाणार होते. मात्र, भरधाव ट्रकच्या धडकेमुळे ही मदतच त्यांचा शेवट सिद्ध झाली. देविदास मते हे जयपूर करमाड परिसरातील सुप्रसिद्ध शेतकरी होते, यांच्या मृत्यूमुळे संपूर्ण गाव हळहळले आहे. त्यांच्या पश्चात पत्नी, एक मुलगा, तीन मुली, सून, जावई आणि नातवंडांसह मोठा परिवार आहे.
