Pune Crime News : देशभरात नवरात्रोत्सवात देवीचा जागर आणि महिलांच्या सन्मान सोहळ्यांचे आयोजन होत असताना पुण्यात मात्र एक भयावह आणि संतापजनक घटना घडली. विद्येचे माहेरघर म्हणून ओळखल्या जाणाऱ्या या शहरात रस्त्यावर एका तरुणाने तरुणीला लाथा-बुक्क्यांनी ठेचले, असा व्हिडिओ सोशल मीडियावर व्हायरल झाला आहे. ही घटना किरकोळ वादातून घडली असावी, असे व्हिडिओतून दिसते. या घटनेमुळे शहरात संतापाची लाट उसळली आहे. नवरात्रासारख्या पवित्र उत्सवाच्या पार्श्वभूमीवर महिलांवरील ही हिंसा अत्यंत निंदनीय असल्याची प्रतिक्रिया येत आहेत.
नेमकं काय घडलं?
मंगळवारी (३० सप्टेंबर) रात्री ८ वाजण्याच्या सुमारास पुणे-सातारा रोडवरील के.के. मार्केट ते चव्हाण नगर जाणाऱ्या मार्गावर ही घटना घडली. शंकर महाराज मठच्या विरुद्ध असलेल्या रस्त्यावर एका तरुणाने तरुणीला जमिनीवर गुडघ्याने दाबून ठेवले आणि लाथा-बुक्क्यांनी बेदम मारहाण केली.
व्हिडिओनुसार, आरोपीने तरुणीला कानशिलात मारली आणि अनेकदा मुक्के मारले. ही मारहाण सार्वजनिक रस्त्यावर भरदुपारी घडली असल्याने परिसरातील नागरिक स्तब्ध झाले. फ्री प्रेस जर्नलच्या पत्रकाराने के.के. मार्केट ते चव्हाण नगर मार्गे जाताना हा संपूर्ण प्रकार मोबाईलमध्ये कैद केला असून, तो सोशल मीडियावर वेगाने व्हायरल होत आहे.
मारहाण कुठल्या कारणामुळे झाली, आरोपी तरुण आणि पीडित तरुणी यांच्यातील नाते काय, याबाबत अद्याप कोणतीही स्पष्ट माहिती समोर आलेली नाही. सहकारनगर पोलिस ठाण्याचे वरिष्ठ अधिकाऱ्यांनी सांगितले, की रात्री उशिरापर्यंत कोणतीही औपचारिक तक्रार मिळालेली नाही. मात्र, व्हिडिओ व्हायरल झाल्यानंतर पोलिसांनी स्वतःहून तपास सुरू केला असून, आरोपीला शोधण्यासाठी प्रयत्न तीव्र केले आहेत. घटनास्थळी उपस्थित नागरिकांनी मदत करण्याऐवजी फक्त व्हिडिओ काढला, ज्यामुळे सामाजिक जबाबदारीवर प्रश्न उपस्थित होत आहेत.
महिलांच्या सुरक्षिततेवर प्रश्नचिन्ह
ही घटना पुण्यातील महिलांच्या सुरक्षिततेवर एक मोठे प्रश्नचिन्ह उपस्थित करते. नवरात्रासारख्या उत्सवकाळात महिलांच्या सन्मानावर भर देण्यात येत असताना सार्वजनिक ठिकाणी होणारी ही हिंसा असह्य आहे. सामाजिक कार्यकर्ते आणि नागरिकांकडून या प्रकरणात तात्काळ न्याय मिळावा आणि आरोपीला कठोर शिक्षा व्हावी, अशी मागणी होत आहे. पुण्यात गेल्या काही महिन्यांत महिलांवरील हिंसेसंबंधी अनेक घटना घडल्या असून, यासाठी पोलिस प्रशासनाने अधिक सक्रिय भूमिका घ्यावी, असा आग्रह केला जात आहे.
