NCP Leaders Meet CM Devendra Fadnavis: उपमुख्यमंत्री अजित पवार यांच्या अपघाती निधनानंतर राज्याच्या राजकारणात, विशेषतः राष्ट्रवादी काँग्रेसमध्ये अभूतपूर्व पेच निर्माण झाला आहे. काल बारामतीमध्ये अजितदादांना अखेरचा निरोप दिल्यानंतर राजकीय हालचालींना वेग आला असून, राष्ट्रवादीच्या (अजित पवार गट) प्रमुख नेत्यांनी तातडीने मुख्यमंत्री देवेंद्र फडणवीस यांची भेट घेतली आहे.
सत्तेतील वाटा आणि खात्यांवर खलबते
अजित पवारांच्या पश्चात त्यांच्याकडे असलेली महत्त्वाची खाती राष्ट्रवादीकडेच राहावीत, यासाठी पक्षाच्या बड्या नेत्यांनी कंबर कसली आहे. सुनील तटकरे, छगन भुजबळ, प्रफुल्ल पटेल आणि धनंजय मुंडे यांनी मुख्यमंत्र्यांशी चर्चा केली. अजितदादांकडे असलेली वित्त व नियोजन, उत्पादन शुल्क आणि क्रीडा ही खाती राष्ट्रवादीच्याच मंत्र्यांना मिळावीत, अशी मागणी या बैठकीत करण्यात आली. प्रदेशाध्यक्ष सुनील तटकरे आज दुपारी माध्यमांशी संवाद साधून यावर अधिकृत भाष्य करण्याची शक्यता आहे.
दोन्ही राष्ट्रवादी एकत्र येणार?
अजित पवारांच्या नेतृत्वाखालील राष्ट्रवादीत आता नेतृत्वाची पोकळी निर्माण झाली आहे. त्यांच्या तोडीचा सर्वसमावेशक नेता सध्या दुसऱ्या फळीत नसल्याने, दोन्ही राष्ट्रवादी काँग्रेसचे विलीनीकरण करण्याबाबतच्या हालचाली सुरू झाल्या आहेत. या संकटकाळात पवार कुटुंब एकत्र येऊन पक्षाच्या भवितव्याचा निर्णय घेण्याची शक्यता आहे. विलीनीकरणाचा संपूर्ण चेंडू आता शरद पवार यांच्या कोर्टात असून, ते यावर काय भूमिका घेतात याकडे सर्वांचे लक्ष लागले आहे.
नेतृत्वाचा पेच
यापूर्वी दोन्ही गट एकत्र येण्यासाठी केवळ अजित पवार हेच प्रामुख्याने चर्चेत असायचे. दुसरीकडे शरद पवार गटाकडून सुप्रिया सुळे, जयंत पाटील आणि अमोल कोल्हे चर्चेत होते. मात्र, आता दादांच्या जाण्याने संपूर्ण राजकीय समीकरणे बदलली असून, सत्तेतील वाटा टिकवणे आणि पक्ष वाचवणे असे दुहेरी आव्हान राष्ट्रवादीच्या नेत्यांसमोर उभे राहिले आहे.
