Pune Mayor : पुणे महानगरपालिकेच्या ५८ व्या महापौर म्हणून मंजुषा नागपुरे यांनी आज सोमवारी ९ फेब्रुवारी २०२६ रोजी आपल्या पदाची अधिकृत सूत्रे हाती घेतली. पदभार स्वीकारताच त्यांनी साधेपणाचा आणि शिस्तीचा आदर्श घालून दिला. त्यांचे स्वागत करण्यासाठी वरिष्ठ अधिकाऱ्यांनी आणलेले महागडे पुष्पगुच्छ स्वीकारण्यास महापौरांनी नम्रपणे नकार दिला आणि हात जोडून केवळ अभिवादन स्वीकारले. त्यांच्या या कृतीची सध्या महापालिका वर्तुळात मोठी चर्चा सुरू आहे.
बिनविरोध निवड
पुणे महापालिकेच्या महापौरपदी मंजुषा नागपुरे तर उपमहापौरपदी परशुराम वाडेकर यांची बिनविरोध निवड झाली आहे. सुरुवातीला काँग्रेस आणि राष्ट्रवादी काँग्रेसने (शरद पवार गट) अर्ज दाखल केले होते, मात्र भाजपच्या विनंतीनंतर त्यांनी अर्ज मागे घेतले. प्रभाग ३५ मधून निवडून आलेल्या मंजुषा नागपुरे या पुणे महापालिकेच्या इतिहासात बिनविरोध निवडून आलेल्या पहिल्या महिला नगरसेविका आहेत. उपमुख्यमंत्री अजित पवार यांच्या अकाली निधनामुळे भाजपने कोणताही विजयोत्सव किंवा झगमगाट न करण्याचा निर्णय घेतला होता. पीठासन अधिकारी तथा जिल्हाधिकारी जितेंद्र डुडी यांनी या निवडीची अधिकृत घोषणा केली.
पहिल्याच दिवशी ॲक्शन मोड; कचरा आणि पुराच्या प्रश्नावर भाष्य
पदभार स्वीकारल्यानंतर महापौरांनी आपल्या कामाची दिशा स्पष्ट केली. ‘स्वच्छ प्रभाग, सुंदर प्रभाग’ ही त्यांची मुख्य संकल्पना असून त्यांनी प्रशासनाला पहिल्याच दिवशी काही महत्त्वाचे आदेश दिले: १. स्वच्छता: शहरात कुठेही कचऱ्याचे ढीग दिसणार नाहीत, याची खबरदारी घेण्याच्या सूचना त्यांनी आयुक्तांना दिल्या. २. पूर नियंत्रण: सिंहगड रोड परिसरातील पुराचा प्रश्न कायमस्वरूपी सोडवण्यासाठी संरक्षक भिंत बांधणे आणि ‘फ्लड अलर्ट सिस्टिम’ (पूर इशारा यंत्रणा) कार्यान्वित करणे ही आपली प्राथमिकता असल्याचे त्यांनी सांगितले.
कामाचा नवा अध्याय
महापालिका आयुक्त नवल किशोर राम आणि इतर वरिष्ठ अधिकाऱ्यांच्या उपस्थितीत हा पदभार सोहळा पार पडला. उपमहापौर परशुराम वाडेकर यांनीही महापौरांच्या शिस्तीचे स्वागत करत, पुण्याच्या विकासासाठी आम्ही कटिबद्ध असल्याचे स्पष्ट केले. पुण्याच्या नव्या महापौरांच्या या साध्या आणि कामाप्रती असलेल्या गांभीर्यामुळे पुणेकरांच्या अपेक्षा उंचावल्या आहेत.
