पिंपरी : पिंपरी-चिंचवड पोलिस आयुक्तालयात कार्यरत असलेल्या ८०१ पोलिस अंमलदारांच्या बदल्या पारदर्शक पद्धतीने करण्यात आल्या आहेत. पोलिस आयुक्त विनय कुमार चौबे यांच्या मार्गदर्शनाखाली दोन दिवसांत ही प्रक्रिया सुनियोजित पद्धतीने पूर्ण झाली. या बदल्यांमध्ये ३१ मे २०२५ रोजी त्यांच्या नियुक्तीच्या ठिकाणी ५ वर्षांचा कार्यकाल पूर्ण करणाऱ्या अंमलदारांचा समावेश आहे.
बदल्यांसाठी पोलिस आस्थापना मंडळाची बैठक घेऊन संबंधित अंमलदारांना २३ मे रोजी निगडी पोलिस मुख्यालयात उपस्थित राहण्यास सांगण्यात आले होते. बैठकीदरम्यान पोलिस स्टेशन आणि विविध शाखांमधील उपलब्ध रिक्त पदांची यादी स्क्रिनवर दाखवण्यात आली. त्यानंतर अंमलदारांना त्यांच्या पसंतीनुसार बदलीचे ठिकाण निवडण्याची संधी देण्यात आली. या प्रक्रियेत ७९ अंमलदारांची गुन्हे शाखेत, तर ७२२ अंमलदारांची पोलीस स्टेशन व इतर शाखांमध्ये प्रशासकीय बदल्या करण्यात आल्या.
या संपूर्ण प्रक्रियेत सेवा अभिलेख, कार्यक्षमता आणि वरिष्ठ अधिकाऱ्यांच्या शिफारशींचा विचार करून, कोणताही भेदभाव न करता बदल्या पारदर्शकतेने पार पडल्याचे पोलिस प्रशासनाने स्पष्ट केले आहे. बदल्या हा संवेदनशील विषय असून, सर्व कर्मचाऱ्यांना विश्वासात घेऊन आणि त्यांची मते विचारात घेऊन ही प्रक्रिया पूर्ण केली गेली असल्याचे पोलीस आयुक्त विनयकुमार चौबे यांनी सांगितले.
