Blood Donation Camp : पुण्यातील चांद्रसेनीय कायस्थ प्रभू (CKP) समाज संस्थेच्या वतीने नुकतेच एका भव्य रक्तदान शिबिराचे यशस्वी आयोजन करण्यात आले होते. हिंदुहृदयसम्राट बाळासाहेब ठाकरे आणि धर्मवीर आनंद दिघे यांच्या जयंतीचे औचित्य साधून राबवण्यात आलेल्या या समाजोपयोगी उपक्रमाचे हे सलग पाचवे वर्ष होते. हे शिबिर रविवार, 25 जानेवारी 2026 रोजी कर्वेनगर येथील शैलेश सभागृहात पार पडले.
याप्रसंगी विविध क्षेत्रांतील मान्यवरांनी उपस्थिती लावून रक्तदात्यांचा उत्साह वाढवला. यामध्ये गुप्ते हॉस्पिटलचे संचालक श्री. नितीन गुप्ते, डॉ. नितीन धांडे आणि नवनिर्वाचित नगरसेविका सौ. रूपाली सचिन पवार यांचा प्रामुख्याने समावेश होता. या संपूर्ण कार्यक्रमाचे नियोजन संस्थेचे अध्यक्ष मंदार कुलकर्णी, सचिव राजेंद्र देशपांडे, सहसचिव सौ. पूनम कारखानीस आणि विश्वस्त राहुल दिघे यांच्या मार्गदर्शनाखाली करण्यात आले होते.
याशिवाय शिबिराच्या यशस्वीतेसाठी विश्वस्त सौ. ईशा दिघे आणि खजिनदार श्री. प्रभाकर ताम्हाणे यांनीही परिश्रम घेतले. रक्तदात्यांनी दिलेल्या उत्स्फूर्त प्रतिसादाबद्दल आणि या सामाजिक कार्यात सहभागी झाल्याबद्दल संस्थेच्या वतीने सर्व उपस्थितांचे व रक्तदात्यांचे आभार मानण्यात आले आहेत.
