पुणे : वानराज आंदेकर व आयुष कोमकर हत्याकांडांमुळे भडकलेल्या आंदेकर-कोमकर टोळी युद्धात पुन्हा एकदा रक्तरंजित पर्व सुरू झाले आहे. शनिवारी (ता. १ नोव्हेंबर) दुपारी कोंढवा-कात्रज परिसरातील खडी मशीन चौकाजवळ पेट्रोलपंपासमोर रिक्षाचालक गणेश काळे (वय ३२) याची गोळ्या व कोयत्याने निर्घृण हत्या करण्यात आली.
ही हत्या वानराज आंदेकरच्या २०२४ मधील हत्येच्या बदला म्हणून घडली असल्याचे पोलिस तपासात निष्पन्न झाले आहे. विशेष म्हणजे, गणेशच्या हत्येच्या काही दिवस आधी आरोपी कृष्णा आंदेकर याला वैद्यकीय तपासणीसाठी ससून रुग्णालयात आणण्यात आले होते. त्या वेळी हत्याकांडातील मुख्य आरोपींनी थेट रुग्णालयात जाऊन कृष्णाची भेट घेतल्याची माहिती समोर आली असून, यातच हत्येची ‘सुपारी’ फिक्स झाली का, असा संशय व्यक्त केला जात आहे. पोलिसांच्या हलगर्जीपणामुळे अशी भेट शक्य झाली का, हा प्रश्नही उपस्थित होत आहे.
नेमकं काय घडलं?
गणेश काळे हे येवलेवाडी येथील रहिवासी असून, तो वानराज आंदेकर हत्याकांडातील आरोपी समीर काळे याचा सख्खा भाऊ होता. समीरवर वानराज हत्येसाठी शस्त्र पुरवठ्याचा आरोप आहे. दुपारी साडेतीनच्या सुमारास गणेश रिक्षा घेऊन खडी मशीन चौकाकडे जात असताना दोन दुचाकींवरून आलेल्या चार हल्लेखोरांनी त्याचा पाठलाग केला. पेट्रोलपंपाजवळ रिक्षा अडवून त्यांनी जवळजवळ गोळीबार केला.
एकूण नऊ गोळ्या झाडण्यात आल्या, ज्यात गणेशच्या मान, छातीत व पोटात धक्का लागला. तो खाली पडताच दोन आरोपींनी कोयत्याने डोक्यात व चेहऱ्यावर दोन वार केले. ही हत्या वानराज आंदेकर हत्येप्रमाणेच ‘पॅटर्न’ वापरून करण्यात आली असल्याचे पोलिस म्हणतात. गणेश जिवंत अवस्थेत ससून रुग्णालयात नेण्यात आला, पण उपचारादरम्यान त्याचा मृत्यू झाला.
ससून रुग्णालयात ‘भेट’चा संशय
गणेश हत्येच्या काही दिवस आधी कृष्णा आंदेकरला कारागृहातून वैद्यकीय तपासणीसाठी ससून रुग्णालयात आणण्यात आले होते. त्या वेळी हत्याकांडातील मुख्य आरोपी अमन शेख, अरबाज पटेल व मयूर वाघमारे यांनी रुग्णालयात घुसून कृष्णाशी भेट घेतल्याची माहिती पोलिस तपासात समोर आली आहे. ही भेट हत्येच्या ‘आदेशासाठी’ झाली असल्याचा संशय आहे.
बंडू आंदेकर, कृष्णा व त्यांचा नातू स्वराज वाडेकर यांच्या सूचनेनुसारच ही हत्या रचण्यात आली, असेही सांगितले जाते. पोलिस उपायुक्त (झोन ५) राजकुमार शिंदे यांनी सांगितले की, जेलमध्ये बसूनच बंडू आंदेकरने आरोपींना पैशाची पुरवठा केला. शिवजयंती व गणपती उत्सव काळातही आंदेकर टोळीने हत्येची योजना आखली होती.
कारागृहातील आरोपींची वैद्यकीय तपासणीसाठी रुग्णालयात नेलं जात असताना पोलिसांना त्यांची सतत निगराणी ठेवावी लागते. तपासणीनंतर थेट कारागृहात परत नेलं जातं व नोंद केली जाते. तरीही अशी भेट कशी शक्य झाली? पोलिसांच्या हलगर्जीपणामुळे टोळी सदस्यांना संधी मिळाली का? हे प्रश्न उपस्थित होत आहेत. कोंढवा पोलिस तपासणीनंतर या पैलूची खातरजमा करीत आहेत.
