पुणे: मध्य रेल्वेच्या पुणे विभागातील ७७ प्रवासी इलेक्ट्रिक आणि डिझेल इंजिनमध्ये एआय आधारित कॅमेरे बसवण्यात येणार आहेत. हे कॅमेरे ३६० अंशांच्या कोनातून प्रत्येक हालचालीवर लक्ष ठेवतील. त्यामुळे रुळांपासून इंजिनच्या आतील हालचाली टिपल्या जाणार आहेत. या कॅमेऱ्यामुळे अपघाताचे कारण शोधणे सोपे होणार आहे. शिवाय रेल्वे पायलटवर वॉच ठेवता येणार आहे. यामुळे रेल्वे प्रवाशांच्या सुरक्षेत आणखी भर पडणार आहे. प्रत्येक इंजिनमध्ये अंदाजे दहा लाख रुपये खर्चुन सीसीटीव्ही कॅमेरे बसवले जातील. या कॅमेऱ्यामधील रेकॉर्डिंग पूर्णपणे ऑफलाइन मोडमध्ये असेल, त्यामुळे कोणत्याही प्रकारच्या हंकिंगचा प्रकार होणार नाही. आपत्कालीन परिस्थितीच्या तपासात महत्त्वाचे इनपूट मिळेल. त्याचा फायदा सत्य शोधण्यास होणार आहे.
पुणे रेल्वे विभागाच्या ताफ्यात एकूण ७७ इलेक्ट्रिक आणि डिझेल इंजिन आहेत. प्रत्येक इंजिनमधील दोन्ही बाजूला असलेल्या चालक केबिनमध्ये प्रत्येकी एक कॅमेरा, तर इंजिनच्या बाहेर चार, बाजूला एक अशाप्रकारे, एका इंजिनमध्ये सहा सीसीटीव्ही कॅमेरे लावण्यात येणार आहेत. त्याचबरोबर प्रत्येक इंजिनमध्ये सीसीटीव्ही ठेवणारी यंत्रणा बसवली जाणार आहे. हे कॅमेरे हाय डेफिनेशन आणि हाय रिझोल्युशनचे असतील. त्यामुळे रुळ, रेल्वे क्रॉसिंग व परिसरातील हालचालींवर नजर ठेवणे शक्य होणार आहे. परिणामी, अपघातांची कारणे शोधण्यात ही प्रणाली उपयुक्त ठरेल, तसेच डयूटीवर असताना लोकोपायलट काय करतोय, याची माहिती मिळणार आहे. हे कॅमेरे लावण्यासाठी लवकरच निविदा प्रक्रिया राबवण्यात येणार आहे.
त्यानंतर कॅमेरे लावण्यात येतील. याबाबत मध्य रेल्वेचे पुण्याचे जनसंपर्क अधिकारी हेमंत कुमार बेहेरा यांनी सांगितले, पुणे विभागातील सर्व इलेक्ट्रिक आणि डिझेल इंजिनमध्ये एआय कॅमेरे लावण्यात येणार आहेत. त्यासाठी निविदा प्रक्रिया लवकरच राबवण्यात येणार आहे. यामुळे प्रवाशांची सुरक्षा आणखीच वाढणार आहेत.
