Bhigwan Kidnapping Case : भिगवण येथील अपहरण प्रकरणात नवा ट्विस्ट समोर आला आहे. याआधी स्वतःच्या इच्छेने मुलासोबत गेल्याचे सांगणाऱ्या तरुणीने आता जबाब बदलत जहीर शेख याने आपले अपहरण केल्याचा आरोप केला आहे.
तरुणीने दिलेल्या तक्रारीनुसार, आरोपीने तिच्यावर लैंगिक अत्याचार करत कुटुंबीयांना जीवे मारण्याची धमकी दिल्याचेही म्हटले आहे. या प्रकरणी जहीर शेखसह चौघांविरोधात अपहरण तसेच पॉक्सो अंतर्गत गुन्हा दाखल करण्यात आला आहे.
या प्रकरणाची सुरुवात फेब्रुवारी महिन्यात झाली होती. तेव्हा तरुणीच्या भावाने शेजारी राहणाऱ्या जहीर शेखविरोधात अपहरणाची तक्रार केली होती. मात्र त्यानंतर तरुणीने स्वतः पोलिसांना व्हिडिओ पाठवून आपण स्वेच्छेने त्याच्यासोबत गेल्याचे सांगितले होते आणि प्रेमसंबंध असल्याचेही नमूद केले होते.
दरम्यान, या प्रकरणात तरुणीवर दबाव असल्याचा आरोप गोपीचंद पडळकर यांनी केला होता. त्यांनी आरोपीवर कठोर कारवाईची मागणीही केली होती.
तसेच न्यायालयातही तरुणीने सुरुवातीला आरोपीच्या बाजूने जबाब दिला होता. मात्र दोन महिन्यांनंतर अचानक जबाब बदलल्याने या प्रकरणाला नवे वळण मिळाले आहे.
पोलिसांकडून या घटनेचा सखोल तपास सुरू असून बदललेल्या जबाबानंतर पुढील कायदेशीर कारवाईला वेग येण्याची शक्यता आहे.
