PCMC Election Results: महाराष्ट्र महानगरपालिका निवडणुकीच्या निकालांमध्ये पुणे आणि पिंपरी-चिंचवड या दोन्ही शहरांत भारतीय जनता पक्षाने आपले वर्चस्व कायम राखल्याचे दिसत आहे. पिंपरी-चिंचवडमध्ये भाजपने स्पष्ट बहुमताच्या दिशेने वाटचाल केली असून, पुण्यातही अनेक दिग्गज नेत्यांना पराभवाचा धक्का बसला आहे.
पिंपरी-चिंचवड: भाजपकडून विरोधकांचा धुव्वा
पिंपरी-चिंचवड महानगरपालिकेच्या एकूण 128 जागांपैकी भाजपने तब्बल 77 जागांवर आघाडी मिळवत एकतर्फी वर्चस्वाकडे वाटचाल केली आहे. राष्ट्रवादी काँग्रेस (अजित पवार गट) 37 जागांसह दुसऱ्या क्रमांकावर आहे. मात्र, महाविकास आघाडीतील इतर घटक पक्षांची कामगिरी अत्यंत निराशाजनक राहिली आहे.
- भाजप: 77 (आघाडी)
- राष्ट्रवादी (अजित पवार): 37
- शिवसेना (शिंदे गट): 10
- राष्ट्रवादी (शरद पवार): 01
- मनसे: 01
- इतर: 02 विशेष म्हणजे, काँग्रेस आणि शिवसेना (उद्धव ठाकरे) या पक्षांना अद्याप खातेही उघडता आलेले नाही.
पुण्यात २२ वर्षांच्या नगरसेविका साई थोपटे यांचा विजय
पुणे महानगरपालिकेत प्रभाग क्रमांक 36 (क) मधून भाजपने एक नवा इतिहास रचला आहे. अवघ्या 22 वर्षांच्या साई थोपटे यांनी पहिल्याच निवडणुकीत दणदणीत विजय मिळवला असून, त्या महापालिकेतील सर्वात तरुण महिला नगरसेविका ठरल्या आहेत. त्यांच्या या विजयाने युवा कार्यकर्त्यांमध्ये मोठा उत्साह संचारला आहे.
शरद पवार गटाला मोठा हादरा; दिग्गजांचा पराभव
पुण्यात राष्ट्रवादी काँग्रेस शरदचंद्र पवार पक्षाला मोठा राजकीय धक्का बसला आहे. पक्षाचे शहराध्यक्ष सुभाश जगताप यांना पराभवाचा सामना करावा लागला आहे. त्यांच्यासोबतच राष्ट्रवादीच्या ज्येष्ठ नेत्या अश्विनी कदम यांचाही पराभव झाला आहे. तसेच, काँग्रेस सोडून शिवसेनेत (ठाकरे गट) गेलेले आबा बागुल यांनाही मतदारांनी नाकारले आहे. दरम्यान, आतापर्यंतच्या निकालात भाजपचे 19 उमेदवार विजयी झाले आहेत, तर काँग्रेसचे 3 आणि राष्ट्रवादी (अजित पवार) गटाचे 2 उमेदवार विजयी झाले आहेत. प्रभाग क्रमांक 21 (मुकुंदनगर सॅलिसबरी पार्क) मधून भाजपचे श्रीनाथ भीमाले आणि मनीषा चोरबले हे मोठ्या मताधिक्याने आघाडीवर आहेत.
