Six-Coach Metro: पुणे मेट्रोच्या वाढत्या लोकप्रियतेमुळे भविष्यातील प्रवासी भार लक्षात घेऊन महामेट्रोने मोठा निर्णय घेतला आहे. सध्या तीन डब्यांच्या गाड्यांवर चालणाऱ्या मेट्रो मार्गिका क्रमांक 1 आणि 2 वर लवकरच सहा डब्यांच्या मेट्रो धावण्याची तयारी सुरू झाली आहे. हिंजवडी-शिवाजीनगर मेट्रो मार्गिका सुरू झाल्यानंतर प्रवाशांची संख्या झपाट्याने वाढण्याचा अंदाज व्यक्त केला जात असल्याने ही पावले उचलली जात आहेत.
हिंजवडी मेट्रोमुळे वाढणार प्रवासी संख्या
शिवाजीनगर ते हिंजवडी या तिसऱ्या मेट्रो मार्गिकेचे काम अंतिम टप्प्यात असून पहिला टप्पा जुलैमध्ये सुरू होण्याची शक्यता आहे. या मार्गिकेमुळे राजीव गांधी इन्फोटेक पार्कसह आयटी हब थेट शहराच्या मध्यवर्ती भागाशी जोडला जाणार आहे. दररोज लाखो कर्मचारी हिंजवडी परिसरात ये-जा करत असल्याने नवीन मार्गिका सुरू झाल्यानंतर मोठ्या प्रमाणावर प्रवासी मेट्रोकडे वळतील, असा अंदाज आहे. त्यामुळे विद्यमान दोन मार्गिकांवरील गर्दीही लक्षणीय वाढणार आहे.
तीन डब्यांऐवजी सहा डब्यांच्या गाड्यांची तयारी
सध्या पिंपरी-चिंचवड ते स्वारगेट आणि वनाझ ते रामवाडी या दोन्ही मार्गांवर तीन डब्यांच्या मेट्रो सेवा सुरू आहेत. मात्र, आगामी काळात वाढत्या प्रवासी संख्येला सामावून घेण्यासाठी सहा डब्यांच्या नवीन गाड्या खरेदी करण्याची प्रक्रिया सुरू करण्यात येणार आहे. यामुळे एका फेरीत अधिक प्रवाशांची वाहतूक करणे शक्य होणार असून गर्दीवरही नियंत्रण मिळवता येईल.
प्रवासी संख्या तीन लाखांच्या उंबरठ्यावर
मार्च 2026 पर्यंत मेट्रोच्या पहिल्या दोन मार्गिकांवरील दैनंदिन प्रवासी संख्या 1.87 लाखांच्या पुढे गेली आहे. मेट्रो मार्गिका क्रमांक 3 पूर्ण क्षमतेने कार्यान्वित झाल्यानंतर ही संख्या दररोज 2.75 लाख ते 3 लाखांपर्यंत पोहोचू शकते, असा अंदाज महामेट्रोकडून व्यक्त करण्यात आला आहे. भविष्यात दररोज सुमारे सहा लाख प्रवाशांची वाहतूक करण्याचे लक्ष्य ठेवून नियोजन केले जात आहे.
डेपोचाही होणार विस्तार
सहा डब्यांच्या मेट्रो सेवेसाठी केवळ नवीन गाड्यांचीच नव्हे तर पायाभूत सुविधांचीही आवश्यकता आहे. त्यामुळे वनाझ आणि रेंज हिल येथील मेट्रो डेपोचा विस्तार करण्याची तयारी सुरू आहे. अतिरिक्त गाड्यांची देखभाल आणि पार्किंगची सुविधा उपलब्ध करून देण्यासाठी ही कामे केली जाणार आहेत.
मेट्रो जाळे आणखी विस्तारण्याची तयारी
दरम्यान, पुणे मेट्रोच्या विद्यमान मार्गिकांचा विस्तारही वेगाने सुरू आहे. पिंपरी-चिंचवड ते निगडी आणि स्वारगेट ते कात्रज या विस्तार प्रकल्पांबरोबरच वनाझ ते चांदणी चौक तसेच रामवाडी ते वाघोली या नवीन विस्तारांवरही काम हाती घेतले जाणार आहे. या विस्तारांमुळे पुणे आणि पिंपरी-चिंचवडमधील अधिक भाग मेट्रो नेटवर्कशी जोडले जाणार असून शहरातील सार्वजनिक वाहतुकीला नवे बळ मिळणार आहे.
